Nukusda boʻlib oʻtgan Qoraqalpogʻiston Respublikasi Joʻqorgʻi Kengesining toʻqqizinchi sessiyasida Orolboʻyi hududida oziq-ovqat xavfsizligini taʼminlash hamda ichki bozorda narx-navo barqarorligini saqlash toʻgʻrisidagi masala muhokama etildi.

Qoraqalpogʻiston Respublikasi Joʻqorgʻi Kengesi Raisi oʻrinbosari A.Davletov raislik qilgan yigʻilishda taʼkidlanganidek, bugungi kunda koronavirus infeksiyasi tarqalishining oldini olish, iqtisodiyotning barqarorligini hamda oziq-ovqat xavfsizligini taʼminlash muhim vazifamizdir. Joriy yilning 16-oktyabr kuni Oʻzbekiston Respublikasi Prezidenti Shavkat Mirziyoyev raisligida boʻlib oʻtgan videoselektor yigʻilishida oziq-ovqat xavfsizligini taʼminlash, ichki bozorda narx-navo barqarorligini saqlash hamda oziq-ovqat mahsulotlari bilan toʻldirish, har bir hudud boʻyicha aholining keyingi yilning may oyigacha goʻsht, tuxum, un, yogʻ, shakar, guruch, kartoshka, sabzi va piyoz mahsulotlariga boʻlgan ehtiyojini qondirish, ushbu mahsulotlarni qachon, qayerdan olish boʻyicha aniq vazifalar belgilab berildi.

Shuningdek, qisqa fursatda har bir hududda oziq-ovqat xavfsizligi boʻyicha alohida jamgʻarmalarni tashkil etish vazifasi ham topshirildi.

Sessiyada sektor rahbarlarining hududlarda olib borilayotgan chora-tadbirlar, kelgusidagi rejalari boʻyicha hisobotlari tinglandi. Bu borada Oʻzbekiston Respublikasi Oliy Majlisi Senati aʼzolari, Qoraqalpogʻiston Respublikasi Joʻqorgʻi Kengesi deputatlari tomonidan bildirilgan fikr-mulohazalardan soʻng tegishli qaror qabul qilindi.

Dovud ABIBULLAYEV, Maqsad HABIBULLAYEV (surat)

Manba: O'zA