Tashrif davomida tadbirkorlar va investisiya loyihalarining tashabbuskorlari bilan mavjud muammolarni aniqlash va ularni hal etishning samarali algoritmlarini ishlab chiqish bo‘yicha manzilli uchrashuvlar o‘tkazildi. Shuningdek, infratuzilma va ijtimoiy ob'ektlarning bugungi holati tahlili ham amalga oshirildi va uning natijasida mas'ul rahbarlarga har bir ob'ektdan kelgusida foydalanish bo‘yicha o‘z xarajatlarini o‘zi qoplashiga erishish va aholini ijtimoiy xizmatlar bilan keng qamrab olishni nazarda tutuvchi kompleks strategiyalarni ishlab chiqish topshirildi.

 

Hududda investisiya va sanoat sohasida faollikni oshirish borasida kelgusidagi qadamlar muhokama qilindi - mas'ul rahbarlarga mavjud xom ashyo salohiyati va sanoat quvvatlariga asoslangan qo‘shimcha qiymat zanjirlarini shakllantirish uchun optimal sharoit yaratishga qaratilgan tizimli chora-tadbirlarni ishlab chiqish topshirildi. Shu nuqtai nazardan loyiha takliflarini ishlab chiqishda jalb qilingan investisiyalardan sezilarli iqtisodiy samaraga erishish imkonini beradigan “iqtisodiy o‘sish nuqtalari”ni aniqlash va ulardan foydalanishning ahamiyati alohida ta'kidlandi.

 

Investisiya jozibadorligi va ijtimoiy-iqtisodiy rivojlanishning asosiy omillaridan biri bo‘lgan infratuzilmani rivojlantirishga alohida e'tibor qaratildi. Tegishli vazirlik va idoralar rahbarlariga infratuzilmaviy loyihalarni amalga oshirishni jadallashtirish va yangi loyiha takliflarini ishlab chiqish ishlarini muvofiqlashtirish topshirildi.

Shu bilan birga, aholi bandligini ta'minlash va mahalliy aholini jumladan, kasanachilik asosida sanoat kooperatsiyasini yo‘lga qo‘yish orqali barqaror daromad manbai bilan ta'minlash bo‘yicha tezkor chora-tadbirlar ko‘rish zarurligi ta'kidlandi.

 

Tashrif yakunlari bo‘yicha tegishli vazirlik, idora, tijorat banklari va mahalliy hokimliklar rahbarlariga tadbirkorlik faoliyatini yuksaltirish, tarmoqlararo hamkorlik aloqalarini rivojlantirish, eksport salohiyatini oshirish va qo‘shimcha ish o‘rinlari yaratishga qaratilgan aniq ko‘rsatmalar berildi.