“Yoshlar-2020: global hamjihatlik, barqaror taraqqiyot va inson huquqlari” mavzusidagi inson huquqlari boʻyicha Samarqand veb-forumi oʻz ishini yakunladi.

Shuningdek, YEXHTning DIIHB Yoshlar muvofiqlashtirish markazi, Inson huquqlari va gumanitar huquq boʻyicha Pol Uollenberg institutining Yevropa boʻlimi, Afrikalik bolalarning ijodiy taʼlim boʻyicha jamgʻarmasi, YUNESKO kabi nufuzli xalqaro tuzilmalar vakillari, Indoneziya, Tojikiston davlatlari ekspertlarining chiqishlari ham katta qiziqish bilan kutib olindi.

Majlisda YEXHT Yoshlar va xavfsizlik masalalari boʻyicha maxsus vakili Keysi Seferi, Afgʻoniston mustaqil inson huquqlari komissiyasi raisi Shaharzod Akbar, Oʻzbekiston Respublikasi Oliy majlisi Qonunchilik palatasi huzuridagi Yoshlar parlamenti raisi Abdulla Aslonov, YUNFPAning Markaziy Osiyo boʻyicha xalqaro dasturlari muvofiqlashtiruvchisi Meder Omurzakov va boshqalar maʼruza qildi.

Munozara, muzokara va savol-javoblarda yoshlarning asosiy eʼtibori Inson huquqlari boʻyicha taʼlimning mohiyati, bu boradagi xalqaro hamkorlikni rivojlantirish, huquq boʻyicha taʼlimga oid zamonaviy dasturlar yaratish, milliy, mintaqaviy va xalqaro miqyosda joriy etishga yoʻnaltirilgan taklif va tavsiyalar ishlab chiqish kabi dolzarb masalalarga qaratildi.

“Yoshlar 2020: global miqyosdagi birdamlik, barqaror taraqqiyot va inson huquqlari” mavzusidagi inson huquqlari boʻyicha Samarqand veb-forumi, shubhasiz, katta ahamiyatga molik voqea boʻldi.

Tadbirda Oʻzbekiston Prezidenti tashabbusi bilan ishlab chiqilgan Yoshlar huquqlari boʻyicha xalqaro konvensiya loyihasi keng muhokama qilindi.

Mazkur loyihaning yaratilishi va Samarqand forumi ishtirokchilari muhokamasiga taqdim etilishi mamlakatimiz oʻz tashabbuslarini nafaqat soʻzda, balki aniq amaliy saʼy-harakatlarda ifodalashga harakat qilayotganidan dalolat.

Gʻayrat XONNAZAROV, A.ABDULLAYEV (surat), OʻzA

Manba: O'zA