Namangan shahridagi “Afsonalar vodiysi” madaniyat va istirohat bogʻi hududi 155 gektar. Mazkur dam olish maskanida 123 million dollarga teng loyiha amalga oshirilmoqda.

Davlatimiz rahbari 2018-yil may oyida viloyatga tashrifi chogʻida “Afsonalar vodiysi” madaniyat va istirohat bogʻi loyihasi bilan tanishgan va uni eng zamonaviy talablar asosida barpo etish zarurligini taʼkidlagandi. Oʻtgan yilgi tashrifi doirasida qurilish ishlarini koʻzdan kechirib, uni tez va sifatli amalga oshirish yuzasidan tegishli koʻrsatmalar bergan edi.

Shu davr mobaynida bu yerda keng koʻlamli bunyodkorlik ishlari amalga oshirildi. Hozirda qisman ishga tushirilgan madaniyat va istirohat bogʻi toʻliq foydalanishga topshirilsa yiliga 600 ming nafar aholiga xizmat koʻrsatish imkoniyati yaratiladi.

Ayni paytda 16 turdagi attraksionli tematik park, 2 ming 400 oʻrinli amfiteatr, 7 xil suv attraksionlari va 16 ta basseynli akvapark, 2 ta zamonaviy sharshara va musiqali favvora, 3 ta restoran, 1 ming 800 oʻrinli 2 ta avtoturargoh tashkil etilgan. 2022-yil mart oyiga qadar milliy hunarmandlar markazi, masjid, 400 oʻrinli mehmonxona, 110 ta villani ishga tushirish rejalashtirilgan.

1 ming 500 ta ish oʻrni yaratish koʻzda tutilgan bu maskanda bugungi kunda 600 nafar ishchi-xodim faoliyat yuritmoqda.

- Ikki yil oldin mana shu bogʻ loyihasi bilan tanishib, unga “Afsonalar vodiysi” deb nom berishni taklif taklif qilgandim, nomiga munosib boʻlibdi. Mamlakatimizda bu kabi zamonaviy dam olish maskanlarini hali koʻplab barpo etamiz, - dedi davlatimiz rahbari.

Manba: O'zA