2020-yilning 7-yanvar kuni O‘zbekistonning Beniluks mamlakatlaridagi Elchisi Dilyor Xakimov Brussel press-klubida mamlakatimizning Yevrosiyo iqtisodiy ittifoqi (YOII) bilan hamkorligi mavzusida nutq so‘zladi.

Ta’kidlanganidek, O‘zbekiston milliy manfaatlarga asoslangan ochiq, o‘zaro foydali va konstruktiv tashqi siyosat yuritmoqda. Qo‘shni davlatlar bilan hamkorlikni rivojlantirish va jahon hamjamiyatiga integratsiyalashish ustuvor yo‘nalishlardan biri hisoblanadi. Yangi iqtisodiy siyosat sharoitida O‘zbekiston biron bir xorijiy davlatlar yoki xalqaro va mintaqaviy tashkilotlar, shuningdek, integratsion birlashmalar bilan hamkorlik qilishda o‘zini chetga olish maqsadida emas.

Xususan, hozirgi vaqtda O‘zbekiston Armaniston, Belorusiya, Qozog‘iston, Qirg‘iziston va Rossiyani birlashtirgan YOII bilan hamkorlik masalalarini o‘rganishni boshladi. Ushbu mamlakatlar yirik bozor va muhim tranzit yo‘lagi sifatida O‘zbekistonda qiziqish uyg‘otadi. YOIIga a’zo davlatlar bilan mehnat migratsiyasi sohasida hamkorlikni kuchaytirish ham muhim ahamiyatga ega.

Elchi ta’kidlaganidek, YOII bilan hamkorlik masalalarida faqatgina iqtisodiy aloqalar to‘g‘risida so‘z bormoqda va bu jarayon boshqa birlashmalar doirasidagi majburiyatlarni rad etishni anglatmaydi. O‘zbekiston boshqa davlatlar, shu jumladan YOIIga a’zo bo‘lmagan mamlakatlar, shuningdek, xalqaro iqtisodiy va moliyaviy tashkilotlar bilan yaqin sheriklik, iqtisodiy va savdo aloqalarini saqlash va rivojlantirishni qat’iyan maqsad qiladi.

Brussel press-klubi YouTube portalidagi o‘z sahifasida videosyujetni joylashtirdi va o‘z obunachilari orasida nutq tezislarini tarqatdi.