Mamlakatimiz ta’lim ravnaqi yo‘lidagi odimlarda xalqaro hamkorlik, rivojlangan davlatlar tajribasini o‘rganish va amaliyotga tatbiq etish muhim ahamiyat kasb etmoqda. Dunyoning rivojlangan mamlakati Yaponiya bilan ham bu borada samarali hamkorlik yo‘lga qo‘yilgan.

Ana shunday hamkorlikning amaliy ifodasi sifatida Namangan viloyatiga Yaponiya elchixonasi vakillari tashrif buyurdi.

Yaponiyaning O‘zbekistondagi elchisi maslahatchisi Suda Atsuщi boshchiligidagi delegatsiya Namangan viloyatiga tashrifi chog‘ida To‘raqo‘rg‘on tumanidagi Isxoqxon Ibrat nomidagi ixtisoslashtirilgan maktabda bo‘lib, ilm maskani faoliyati bilan yaqindan tanishdi.

Tashrif davomida Ibrat maktabiga Yaponiya elchixonasi tomonidan 50 ming AQSh dollari miqdoridagi moddiy-texnik baza hamda yapon tili o‘rgatish uchun markaz ochish rejalashtirildi. Shuningdek, yaponiyalik mehmonlar tumandagi yana bitta maktabga beg‘araz yordam berish tashabbusi bilan chiqdi.

Mehmonlar Axsikent tarixiy yodgorlik majmuasida ham bo‘lib, majmua tarixi va o‘tmishda Farg‘ona vodiysining sivilizatsiya markazi sifatida e’tirof qozongan maskanda amalga oshirilayotgan sa’y-harakatlar bilan yaqindan tanishdi.