Singapurda Osiyo sayyohlik bozori (ITB Asia) xalqaro sayyohlik ko’rgazmasi bo’lib o’tadi, unda Turizmni rivojlantirish davlat qo’mitasi tomonidan hamda O’zbekistonning Singapurdagi elchixonasi ko’magida tashkil etilgan O’zbekiston milliy stendi namoyish etiladi.

Yaqinda Toshkentda qurilgan Hilton mehmonxonasi O’zbekiston delegatsiyalarida ishtirok etib, o’z mehmonlariga xalqaro standartlarga javob beradigan yuqori darajadagi xizmatlarni taklif etadi. O’zbekiston stendida delegatlar chet ellik mehmonlarga mamlakatimiz, hududlarning sayyohlik salohiyati va respublikada turizmning rivojlanayotgan turlari haqida batafsil ma’lumot berishadi.

Bundan tashqari, mehmonlar taklif etilgan tarqatma materiallar, shu jumladan jurnallar, bukletlar, broshyuralar va mamlakatning sayyohlik xaritalari vositasida O’zbekistonning har bir mintaqasining sayyohlik imkoniyatlari bilan tanishishlari mumkin. 16-oktabr kuni o’z ishini boshlagan ITB Asia 2019 xalqaro turizm yarmarkasi 18 oktabrga qadar davom etmoqda.

ITB Asia – bu tashkilotlar o’z imkoniyatlarini namoyish etishi uchun eng yirik zamonaviy maydon hisoblanadi. Uch kun mobaynida Osiyoning yetakchi turistik operatorlari mehmonlarga o’z dasturlarini taqdim etadilar: mehmonxona va restoran biznesi vakillari o’z mehmonxonalarining asosiy xislat va afzalliklarini, IT-kompaniyalar sayyohlik sohasi uchun telekommunikatsion texnologiyalar sohasidagi so’nggi yutuqlarni, turoperatorlar esa sayyohlar uchun ommabop yo’nalish va marshrutlarni namoyish etadilar.

Tadbirga 110 mamlakatdan 11 mingdan ortiq mehmonlar kelishi kutilmoqda.