Joriy yilning avgust oyi oxirida Pusan shahrida (Koreya Respublikasi) boʻlib oʻtgan IX e-ICON Elektron taʼlim jahon musobaqasi final bosqichida Oʻzbekiston terma jamoasi 4 ta nominatsiyaning biri (Cooperation Award) boʻyicha gʻoliblikni qoʻlga kiritib, tashkilotchilar tomonidan maxsus sertifikat bilan taqdirlandi.

Mazkur musobaqa Koreya taʼlim vazirligi hamda Osiyo va Tinch okeani iqtisodiy hamkorlik tashkilotining taʼlim instituti tomonidan tashkil etildi. Musobaqaning Pusan shahridagi final bosqichida 12 ta davlatdan 130 nafar ishtirokchi qatnashdi. Oʻzbekiston jamoasi ushbu musobaqada birinchi marta ishtirok etdi.

Xalq taʼlimi vazirligi tasarrufidagi Xorijiy tillarga ixtisoslashtirilgan davlat umumtaʼlim maktab oʻqituvchisi Sabohat Mahmudova hamda ushbu maktabning 11-sinf oʻquvchilari Barno Nurmuhammedova va Nastarin Mahmudova mazkur musobaqada yurtimiz sharafini himoya qildi.

Musobaqa doirasida Oʻzbekiston vakillari imkoniyati cheklangan oʻquvchilarga koʻmak beruvchi mobil ilovani yaratib, taqdimot qilishdi.

Yaratilgan ilova koʻrish va eshitish hamda sinf doskasidagi maʼlumotlarni yozib olishda qiyinchilikka uchrayotgan oʻquvchilarga qoʻshimcha imkoniyat yaratadi. 

Quyida jamoaning video taqdimotini koʻrishingiz mumkin.