2019-yilning 1-iyul kuni O‘zbekiston Respublikasi Tashqi ishlar vaziri o‘rinbosari Dilshod Axatov mamlakatimizda amaliy tashrif bilan bo‘lib turgan Polsha Respublikasi Tashqi ishlar vaziri o‘rinbosari Marchin Pjidach bilan uchrashdi.

Uchrashuv kun tartibidan siyosiy, savdo-iqtisodiy, investitsiya, turizm, madaniy-gumanitar va boshqa sohalardagi ikki tomonlama munosabatlarning dolzarb masalalari o‘rin oldi.

Ikki tomonining ham konstruktiv muloqotga, o‘zaro manfaatli va ko‘p qirrali hamkorlikni kengaytirishga sodiqligi tasdiqlandi.

O‘zbekiston va Polsha o‘rtasidagi hamkorlikning muayyan jabhalari muhokama qilinib, jumladan o‘zaro savdo hajmlarini oshirish va iqtisodiyotning turli tarmoqlarida tomonlarni qiziqtirgan qo‘shma loyihalarni amalga oshirishga tayyorligi e’tirof etildi. Shu nuqtayi nazardan Iqtisodiy hamkorlik bo‘yicha hukumatlararo komissiya ishiga muntazamlik berish va yilning ikkinchi yarmida Varshava shahrida uning 7-yig‘ilishini o‘tkazish borasidagi takliflar qo‘llab-quvvatlandi.

Shuningdek, 2018-yil sentabr oyida Toshkent shahrida mamlakatimiz iqtisodiyotiga investitsiya va texnologiyalarni jalb qilishga xizmat qiluvchi Polsha Investitsiya va savdo agentligi vakolatxonasining ochilgani ham ma’qullandi.

Uchrashuvda turizmni rivojlantirish masalalariga alohida e’tirbor qaratildi. Polsha tomoni ushbu mamlakat fuqarolariga 2019-yil 1-fevraldan boshlab 30 kun muddatga vizasiz rejim joriy qilinganligi uchun minnatdorchilik izhor etdi. Bu qarorning Polshadan O‘zbekistonga keladigan turistlar oqimining jadallashuviga xizmat qilishi qayd etildi. Hozirda Toshkent va Varshava o‘rtasida to‘g‘ridan-to‘g‘ri aviaqatnovlarni yo‘lga qo‘yish masalasi o‘rganib chiqilmoqda.

Suhbatda madaniy-gumanitar va ilmiy-ta’lim sohalaridagi hamkorlikni chuqurlashtirish masalalari ham ko‘rib chiqildi.

Muzokaralarda Polsha Elchisi Pyotr Ivashkevich ishtirok etdi.