Samarqand davlat tibbiyot institutida “Yuqumli boʻlmagan kasalliklarni erta aniqlash va oldini olish hamda sogʻlom turmush tarzi va toʻgʻri ovqatlanish” mavzusida xalqaro konferensiya oʻz ishini boshladi.

Unda mamlakatimiz, shuningdek, Buyuk Britaniya, Daniya, Rossiya davlatlaridan kelgan olimlar, shifokorlar ishtirok etmoqda.

– Oʻzbekistonda olib borilgan tadqiqotlar shuni koʻrsatdiki, kasalliklarning 85 foizi sogʻlom turmush tarziga amal qilmaslik oqibatida kelib chiqmoqda, – deydi Butunjahon sogʻliqni saqlash tashkilotining Oʻzbekistondagi bosh vakili Liann Kuppens. – Kamharakatlilik, meʼyordan koʻp ovqatlanish va tuzni ortiqcha isteʼmol qilish kasalliklarni keltirib chiqarayotgan asosiy omillardir. Ana shu jihatlar hisobga olinib, ayni paytda sogʻlom turmush tarzini qaror toptirish borasida olib borilayotgan profilaktik ishlar diqqatga sazovor.

Anjumanda Butunjahon sogʻliqni saqlash tashkilotining Yevropa hududiy idorasi, Yuqumli boʻlmagan kasalliklarning oldini olish, nazorat qilish va qarshi kurashish dasturi yetakchi rahbari Jill Farington, Rossiya koloproktologiya oʻquv markazi direktori, Rossiya fanlar akademiyasi muxbir aʼzosi Yuriy Sheligin va boshqalarning mavzuga oid maʼruzalari tinglandi.

Gʻ.Hasanov, A.Isroilov (surat) OʻzA