Tomonlar HUMO milliy toʻlov tizimining imkoniyatlarini kengaytirish masalalarini muhokama qildilar.

Joriy yilning 27-mart kuni Markaziy bankda “MasterCard Europe” vakillari bilan uchrashuv boʻlib oʻtdi.

Markaziy bank axborot xizmati maʼlum qilishicha, uchrashuv davomida tomonlar Oʻzbekiston Respublikasida naqd pulsiz toʻlovlarni rivojlantirish doirasida oʻzaro hamkorlik, shuningdek, xalqaro toʻlov kartalaridan foydalanishni taʼminlash maqsadida HUMO milliy toʻlov tizimining imkoniyatlarini kengaytirish masalalarini muhokama qildilar.

Uchrashuv yakunida tomonlar Markaziy bank va MasterCard Europe oʻrtasida chora-tadbirlar protokolini imzoladilar. Hujjatda oʻzaro aloqalarni va hamkorlikni kengaytirish maqsadida HUMO toʻlov tizimi tarmogʻida toʻlov vositalarini qabul qilish sohasi va infratuzilmasini rivojlantirish, yaratilgan toʻlov infratuzilmasida MasterCard kartalarining foydalanish imkoniyatlarini kengaytirish, shuningdek, Oʻzbekiston Respublikasi aholisining moliyaviy savodxonligini oshirish boʻyicha birgalikda tadbirlar oʻtkazib borish koʻzda tutilgan.

Shuningdek, tomonlar Oʻzbekiston Respublikasi fuqarolarining xalqaro hisob-kitoblarni amalga oshirishda Master Card toʻlov vositalaridan foydalangan holda HUMO toʻlov kartalari imkoniyatlarini kengaytirish istagini bildirdilar.