“Oʻztoʻqimachiliksanoat” uyushmasida Koreya sanoat texnologiyalari instituti (KITECH) Xalqaro hamkorlik departamenti direktori janob Chung Jae-Hak boshchiligidagi delegatsiya bilan uchrashuv boʻlib oʻtdi.

Uchrashuvda Toshkentda “Koreya Respublikasi Hukumatining rasmiy taraqqiyot yordami” doirasidagi grant mablagʻlari hisobidan amalga oshirilayotgan Koreya-Oʻzbekiston toʻqimachilik Texnoparki loyihaning bugungi holati muhokama qilindi.

Tomonlar birgalikda amalga oshirilayotgan nou-xau loyihalari va texnologiyalarni amaliyotga tatbiq etishdagi hamkorlik, mahalliy toʻqimachilik mahsulotlari sifatini nazorat qilish va sertifikatlash, uning raqobatbardoshligini yanada oshirishga qaratilgan chora-tarbirlarni alohida taʼkidlashdi. Shuningdek, tomonlar kelgusida Oʻzbekiston viloyatlarida Texnoparkning qoʻshimcha filiallarini tashkil etish boʻyicha dastlabki kelishuvga erishdi. Bu esa mamlakatimizning chekka hududlarida malakali mutaxassislar tayyorlash va malaka oshirishlari uchun keng imkoniyatlar yaratadi.

Uchrashuv davomida tomonlar toʻqimachilik, sifatni nazorat qilish va sertifikatlash sohasida ilgʻor xalqaro tajribani amalga oshirishda Koreya sanoat texnologiyalari instituti (KITECH) va “Oʻztektoʻqimachiliksanoat“ uyushmasi oʻrtasida oʻzaro munosabatlar yuqori darajada ekanligi va jadal rivojlanib borayotganini taʼkidlashdi.