Nufuzli anjumanning ochilish marosimida Oʻzbekiston Respublikasi tashqi ishlar vaziri Abdulaziz Komilov, BMT Bosh kotibining maxsus vakili, Markaziy Osiyoda preventiv diplomatiya boʻyicha mintaqaviy markazi rahbari Natalya German soʻzga chiqdi. 

 

– Konferensiya davlatimiz tomonidan belgilangan Oʻzbekiston Respublikasi tashqi siyosatining asosiy ustuvor yoʻnalishlarini amalga oshirish doirasida oʻtkazilmoqda, – dedi A.Komilov. – Minglar yillar davomida Markaziy Osiyo oʻz geografik joylashuvi bilan Yevropani Osiyoga, Yaqin Sharqqa bogʻlovchi koʻprik vazifasini oʻtagan. 

 

– Bugungi kunda Markaziy Osiyoda ikki tomonlama va koʻp tomonlama munosabatlar shiddat bilan rivojlanmoqda, – dedi N.German. – Oʻtgan qisqa davrda Markaziy Osiyo davlatlari siyosiy irodasi bilan mintaqada xavfsizlikni taʼminlash borasida qator tashabbuslar oʻrtaga tashlandi. Biz ushbu tashabbuslarni qoʻllab quvvatlaymiz. 

 

Konferensiya Oʻzbekiston Respublikasi Tashqi ishlar vazirligi va BMTning Markaziy Osiyo uchun preventiv diplomatiya boʻyicha mintaqaviy markazi tomonidan tashkil etilgan boʻlib, unda Afgʻoniston, AQSH,Belgiya, Buyuk Britaniya, Daniya, Eron, Germaniya, Gruziya, Hindiston,Isroil, Ispaniya, Italiya, Qozogʻiston, Kanada, Misr, Xitoy, Kuvayt, Ozarbayjon, Qirgʻiziston, Latviya, Malayziya, Niderlandiya, Pokiston, Polsha, Rossiya, Saudiya Arabistoni, Tailand, Turkiya, Vengriya, Ukraina, Oʻzbekiston, Finlyandiya, Fransiya, Shvetsiya, Yaponiya tahliliy markazlarning 100 dan ortiq vakillari, shuningdek, Yevropa Ittifoqi, Shimoliy kengash, Amerika davlatlari tashkiloti, Arktika maslahatlashuv kengashi mintaqaviy tuzilmalari, Jahon banki, Jahon savdo tashkiloti, Yevropa investitsion banki va boshqa xalqaro moliya institutlari ekspertlari ishtirok etmoqda. 

 

Ikki kunlik anjuman doirasida mintaqaviy hamkorlikning hozirgi holati va xavfsizlik, savdo, transport, suvdan foydalanish, taʼlim va ilm-fan sohalarida aloqalarni mustahkamlash masalalarini muhokama qilinadi. 

 

Ayni vaqtda nufuzli anjumanning “Markaziy Osiyoda mintaqaviy hamkorlikning yangi oʻsish surʼatlari – mintaqadan nigoh” mavzusidagi birinchi yalpi yigʻilishi ochildi.