Oliy va oʻrta maxsus taʼlim vazirligi Oʻzbekiston yoshlar ittifoqi hamda hamkor tashkilotlar bilan birgalikda tashkil etilgan “Respublika yosh olimlarining innovatsion loyihalari” grant tanlovi gʻoliblari aniqlandi.

Tanlov yakunlariga koʻra aniq, ijtimoiy-gumanitar va tabiiy fanlar yoʻnalishida toʻqqiz nafar yosh olimga oʻz loyihasini amaliyotga birlamchi tatbiq etishi uchun 5 million soʻmdan berildi.

Yosh olimlarning ushbu loyihalari oʻzini oqlasa va uni Oʻzbekiston sharoitida amaliyotga tatbiq etish mumkin boʻlsa, ularga yana qoʻshimcha 5 million soʻmdan mablagʻ ajratiladi.

Maʼlumot uchun, “Respublika yosh olimlarining innovatsion loyihalari” grant tanlovida bakalavriat, magistratura, doktoranturada tahsil olayotgan, shuningdek, mustaqil izlanuvchi sifatida ilmiy izlanishlar olib borayotgan 18-35 yoshdagi yoshlar oʻzining ilgʻor loyihalari bilan ishtirok etishlari mumkin.