2018-yilning 10-dekabr kuni O‘zbekiston Respublikasi Tashqi ishlar vaziri Abdulaziz Kamilov mamlakatimizga tashrif buyurgan Amerika Qo‘shma Shtatlarining Odam savdosini monitoring qilish va unga qarshi kurashish sohasidagi maxsus topshiriqlar bo‘yicha elchisi Jon Richmondni qabul qildi.

Suhbat davomida O‘zbekiston AQSh hamkorligining ayrim jihatlari yuzasidan fikr almashildi.

So‘nggi ikki yil davomida ikki tomon kun tartibining muhim qismi hisoblangan inson huquqlarini himoya qilish mavzusi bo‘yicha muloqotda O‘zbekiston va AQSh o‘rtasida o‘zaro tushunish va ishonchga erishildi. Bunga esa 2017-2021-yillarda taraqqiyot strategiyasini tadbiq etish doirasida mamlakatimizda amalga oshirilayotgan keng ko‘lamli islohotlar yo‘l ochmoqda.

Jon Richmond O‘zbekistonda bolalar mehnatiga to‘liq barham berishda erishilgan o‘zgarishlar va majburiy mehnatga yo‘l qo‘ymaslik bo‘yicha Hukumat tomonidan qabul qilingan ijobiy natijalarni qayd etdi.

Ushbu yo‘nalishda hamkorlikni davom ettirishdan tomonlar manfaatdor ekanligi tasdiqlandi.

Zafar Yuldashkulov olgan surat