“Obod mahalla” davlat dasturiga muvofiq poytaxtimizda keng koʻlamli bunyodkorlik ishlari amalga oshirilmoqda. Ana shunday bunyodkorlik ishlaridan biri Yakkasaroy tumani Boshliq mavzesida ham olib borildi.

Hududda “Lola” nomli 116-sonli maktabgacha taʼlim muassasasi va “Boshliq” nomli zamonaviy mahalla fuqarolar yigʻini binosining tantanali ochilish marosimi boʻlib oʻtdi. Unda Toshkent shahar hokimi oʻrinbosari Elbek Shukurov va Yakkasaroy tumani hokimi Baxtiyor Shamuratovlar ishtirok etib, mahalla ahlini foydalanishga topshirilgan yangi inshootlar bilan qutladilar. Bu kabi zamonaviy binolar fuqarolarga uzoq muddat xizmat qilishi va hudud chiroyiga koʻrk bagʻishlashini taʼkidlashdi.

Tadbir davomida mahalladagi 127-maktabning kapital taʼmirdan chiqganligi haqidagi yangilik “Boshliq” ahliga koʻtarinki kayfiyat bagʻishladi. Shuningdek, tadbirda bolalar hunarmandchiligi mahsulotlarining savdo yarmarkasi ham tashkil etildi. Tadbir fuqarolarni bir dasturxon ustida yigʻib osh berish bilan yakunlandi.