13-noyabr kuni Oʻzbekiston Respublikasi Prezidenti Shavkat Mirziyoyevning Turkmaniston Prezidenti Gurbanguli Berdimuhamedov bilan telefon orqali muloqoti boʻlib oʻtdi.

Suhbatda davlat rahbarlari keng koʻlamli ikki tomonlama hamkorlikning holati va uni oliy darajada erishilgan kelishuvlar doirasida rivojlantirish istiqbollarini muhokama qildilar.

Oʻzbekiston va Turkmaniston rahbarlarining muntazam uchrashuv va muloqotlari ikki tomonlama doʻstlik va strategik sheriklik munosabatlarini yanada mustahkamlash, iqtisodiyotning turli tarmoqlarida amaliy hamkorlikni kengaytirish uchun ishonchli poydevor boʻlib xizmat qilayotgani katta mamnuniyat bilan qayd etildi.

Prezidentlar oʻzaro tovar ayirboshlashni koʻpaytirish, sanoat, energetika va qishloq xoʻjaligida kooperatsiyani kuchaytirish, samarali transport yoʻlaklarini shakllantirish, hududlararo va gumanitar almashuvni faollashtirish masalalariga alohida eʼtibor qaratdilar.

Tomonlar hamkorlikning eng muhim yoʻnalishlari, jumladan, mintaqaviy xavfsizlik va barqarorlikni taʼminlash, zamonaviy xatar va tahdidlarga qarshi kurashish, suv resurslaridan oqilona foydalanish, energetik salohiyatni samarali rivojlantirish borasidagi yondashuv va pozitsiyalari mushtarak ekanini qayd etdilar.

Ikki va koʻp tomonlama keng koʻlamli hamkorlikni davom ettirish, shuningdek, xalqaro maydonda tashabbuslarni oʻzaro qoʻllab-quvvatlash va mintaqada yirik infratuzilmaviy loyihalarni amalga oshirish muhimligi taʼkidlandi.

Davlat rahbarlari qardosh Oʻzbekiston va Turkmaniston xalqlarining farovonligi yoʻlida koʻp asrlik doʻstlik, yaxshi qoʻshnilik va strategik sheriklik tamoyillariga asoslangan koʻp qirrali munosabatlarni izchil kengaytirish va mustahkamlash borasida intilishlari qatʼiy ekanini yana bir bor tasdiqladilar.