2018-yilning 5-noyabr kuni Oʻzbekiston Respublikasi Tashqi ishlar vaziri Abdulaziz Kamilov Gvineya Respublikasining Favqulodda va Muxtor Elchisi (qarorgohi Tehron shahrida) etib tayinlangan Bangali Diaxabini qabul qildi.

Ishonch yorliqlarini topshirish marosimidan soʻng Vazir Elchini Oʻzbekistonga tayinlangani bilan tabriklar ekan, yuqori va masʼuliyatli lavozimdagi faoliyatida muvaffaqiyatlar tiladi.

Suhbat davomida qayd etilganidek, geografik jihatdan uzoqda boʻlishiga qaramasdan Oʻzbekiston va Gvineya BMT, Islom hamkorlik tashkiloti va boshqa xalqaro tuzilmalarda faol hamkorlik qiladi.

Uchrashuvda hamkorlikning istiqbolli yoʻnalishlari yuzasidan fikr almashildi hamda toʻgʻridan-toʻgʻri aloqalarni qoʻllab quvvatlash va madaniy-gumanitar almashinuvlarni kengaytirishga tomonlar tayyor ekanligi tasdiqlandi.