Ko'rinish
Shrift o'lchami
?
Ekran suxandoni
Ishlab chiqilgan: 
O`zbekiston Respublikasi
Hukumat portali
Boyovutda ko‘p tarmoqli sanoat majmuasi
2018-07-24 | Jamiyat
Sirdaryo viloyati Boyovut tumanida ko‘p tarmoqli sanoat majmuasi – “NCG ENGINEERING Boyovut” kompaniyasi poydevoriga ramziy tamal toshi qo‘yildi.
Shu munosabat bilan tashkil etilgan tadbirda mamlakatimizda qulay ishbilarmonlik muhiti yaratish, faol investitsiya siyosati yuritish borasida amalga oshirilayotgan ishlar yuksak samaralar berayotgani ta’kidlandi.
Prezidentimizning 2017 yil 22-25 noyabr kunlari Janubiy Koreya Respublikasiga tashrifi chog‘ida o‘zaro hamkorlik masalalari, siyosiy, savdo-iqtisodiy, moliya-sarmoyaviy, ilmiy-texnikaviy, madaniy-gumanitar va boshqa sohalardagi davlatlararo aloqalarni yanada rivojlantirish istiqbollari atroflicha muhokama qilingan edi. Tashrif doirasida tashkil etilgan O‘zbekiston – Janubiy Koreya biznes forumi koreyalik ishbilarmonlarning yurtimizga bo‘lgan qiziqishini yanada oshirdi.
– Ushbu loyiha 2018-2023 yillarda amalga oshirilishi rejalashtirilgan, – deydi Boyovut tuman hokimi O.Ashurmatov. – Tashkil etiladigan ko‘p tarmoqli sanoat majmuasida qiymati 300 million AQSH dollari miqdoridagi sarmoya evaziga 100 dan ziyod ishlab chiqarish korxonasi ishga tushiriladi. Bu esa 10 mingdan ortiq ish o‘rni yaratish imkonini beradi.
Ko‘p tarmoqli sanoat majmuasi poydevoriga ramziy tamal toshi qo‘yish tadbirida milliy an’anamizga ko‘ra, doshqozonda osh damlanib, dasturxon yozildi. San’atkorlarning kuy-qo‘shiqlari yig‘ilganlarga bayramona kayfiyat bag‘ishladi.
Abdujalol Qayumov, Furqat Toshmatov (surat) O‘zA
