Janubiy Koreya Respublikasi texnoparklar assotsiatsiyasi raisi Jexun Li rahbarligidagi delegatsiya ishbilarmonlik tashrifi bilan Namangan viloyatiga keldi.

Janubiy Koreya Respublikasining innovatsion siyosat borasidagi tajribasini o‘rganish hamda kichik va o‘rta biznesni rivojlantirish sohasida o‘zaro hamkorlikni yo‘lga qo‘yish maqsadida taklif etilgan Jexun Li viloyat hokimi Xayrullo Bozorov bilan uchrashdi. Unda mamlakatlarimiz o‘rtasida mustaqilligimizning dastlabki yillarida yo‘lga qo‘yilgan iqtisodiy, ijtimoiy, ilmiy hamkorlik aloqalari tobora mustahkamlanib borayotgani ta’kidlandi.

– Prezident Shavkat Mirziyoyevning o‘tgan yil noyabr oyida mamlakatimizga tashrifi doirasida o‘tkazilgan biznes-forumda so‘zlagan ma’ruzasini shaxsan eshitib, o‘zbek ishbilarmonlari bilan hamkorlik borasida yanada keng imkoniyatlar ochilayotganini his etdik, – deydi Jexun Li. – Oradan ko‘p o‘tmay Namanganda “Hyundai” avtomobillarini ishlab chiqarish bo‘yicha loyiha ustida ish boshlangani bilan bu tashabbus isbotini topdi. O‘zbekistonda investitsiya, eksport, turizm yo‘nalishlarida hamkorlik qilish imkoniyatlari keng. Jumladan, bizning assotsiatsiya ham Namangandatexnoparklar tizimini yo‘lga qo‘yish, bu yo‘nalishda ilm-fan va ishlab chiqarish hamkorligi tamoyilini tatbiq etish bo‘yicha hamkorlik qilishga tayyor. Zero, bugun Janubiy Koreyada ham yirik korxonalar emas, balki kichik va o‘rta biznesni qo‘llab-quvvatlashga alohida e’tibor qaratilmoqda va bunda texnoparklar vositasidan samarali foydalanilayotir.

Akromjon Sattorov, Hotam Mamadaliyev (surat) O‘zA