Yaqinda Namangan muhandislik-texnologiya instituti olimlaridan iborat delegatsiya Rossiya Federatsiyasiga bir haftalik safarda bo‘lishdi. 

Institutning o‘quv ishlari bo‘yicha prorektori Oybek Ergashev, muhandislik-texnologiyalari fakulteti dekani Kamoliddin Matkarimov, sanoat ishlab chiqarishni tashkil etish va iqtisodi kafedrasi mudiri Ravshanjon Ismoilov Tyumen oblastiga tashrifi davomida Surgut davlat universitetida bo‘lishdi. 

1993 yilda tashkil topgan Surgut davlat universiteti Rossiyada o‘z o‘rniga ega bo‘lgan nufuzli ta’lim dargohlaridan hisoblanadi. Politexnika, tabiiy fanlar, yuridika, iqtisodiyot va boshqaruv, tibbiyot yo‘nalishlarini o‘zida qamrab olgan mazkur oliy o‘quv yurtida 5 ta institut faoliyat yuritadi. Universitetda 10 mingdan ziyod talaba 20ga yaqin mutaxassislik bo‘yicha tahsil oladi. 

Qayd etish joiz, universitet joylashgan Surgut shahri neft-gaz sanoati keng taraqqiy etib, bu Rossiya Federatsiyasi yalpi ichki mahsulotining 27 foizi salmog‘iga to‘g‘ri keladi. Qolaversa, bu shaharda dunyodagi eng yirik gidro elektro stansiyalar joylashgan bo‘lib, quvvati va ko‘lami jihatidan jahonda ikkinchi o‘rinda turadi.

Ikki tomonlama o‘tkazilgan muloqotda O‘zbekistonda yoshlar ta’lim-tarbiyasi, xususan, oliy ta’lim sohasini tubdan isloh qilish borasidagi islohotlar, bu borada Prezidentimiz tomonidan qabul qilinayotgan farmon va qarorlar mazmun-mohiyati, undan ko‘zda tutilayotgan samaralar haqida atroflicha ma’lumotlar berildi.