Qarshi shahridagi Abdulla Oripov haykali o‘rnatilgan xiyobonda O‘zbekiston Respublikasi Davlat xavfsizlik xizmati chegara qo‘shinlarining Qashqadaryo viloyatidagi harbiy qismlarida muddatli harbiy xizmat burchini o‘tab, Qurolli Kuchlar rezerviga bo‘shatilgan askarlarni tantanali kuzatish marosimi bo‘lib o‘tdi.

Marosimda muddatli harbiy xizmat davomida faolligi va namunali xulqi bilan ajralib turgan bir guruh oddiy askarlar taqdirlandi. Jumladan, yuqori jismoniy salohiyat ko‘rsatgan harbiy xizmatchilarga Davlat xavfsizlik xizmati raisi tomonidan yo‘llangan minnatdorlik xatlari taqdim qilindi. Shuningdek, bir guruh yigitlarga harbiy xizmat davomida namoyish etgan mardligi, jasorati, intizomi uchun "Chegara qo‘shinlari a’lochisi" ko‘krak nishoni topshirildi. Harbiy qism qo‘mondonligi tomonidan jangovar va ma’naviy tayyorgarligi, bilimi yuqori baholangan askarlarga tavsiyanomalar taqdim etildi.