Afg‘oniston bo‘yicha Toshkent xalqaro konferensiyasida so‘zga chiqqan Turkmaniston tashqi ishlar vaziri o‘rinbosari V.Xadjiyev Afg‘oniston bilan turli sohalarda, xususan, elektr energiyasi, transport logistikasi, fan-ta’lim yo‘nalishida yaxshi aloqalar o‘rnatilgani haqida gapirdi.

V.Xadjiyev Afg‘onistonda tinchlikni ta’minlash uchun dunyo hamjamiyati tayyor ekanini, xususan, Turkmaniston ham bu ezgu harakatlarni qo‘llab-quvvatlashini ma’lum qildi. 

– Turkmaniston tomoni bu yo‘lda barcha imkoniyatlarni ishga solishga tayyor, – dedi vazir o‘rinbosari. – Aynan Toshkent konferensiyasida bugun uzoq kutilgan kelishuvlar va natijaga erishamiz, deb ishonamiz.