Joriy yilning 6 mart kuni Davlat soliq qo‘mitasi Raisi B.Parpiyev mamlakatimizga amaliy tashrif bilan kelgan Rossiya Federatsiyasi Federal soliq xizmati rahbari o‘rinbosari Aleksey Overchuk boshchiligidagi delegatsiya vakillari bilan uchrashdi.

Davlat soliq qo‘mitasi Raisi B.Parpiyev Soliq ma’muriyatchiligi sohasidagi islohotlarni amalga oshirish, soliq-byudjet siyosati va iqtisodiy hamkorlik borasidagi o‘zaro aloqalarni mustahkamlash, yangi tahrirdagi Soliq kodeksini ishlab chiqishda amaliy yordam ko‘rsatishga rozilik bildirilgani uchun Rossiya Federatsiyasi Federal soliq xizmati rahbariyatiga o‘z minnatdorchiligini bildirdi.

Uchrashuvda tomonlar o‘zaro tajriba almashish, ikki davlat soliq ma’murchiligi amaliyotida erishgan yutuqlari bilan o‘rtoqlashish va kelgusida sohani rivojlantirish borasida uzoq muddatli hamkorlikni yo‘lga qo‘yish masalalarini muhokama qildilar.

Xususan, davlat byudjetiga tushadigan tushumlarni prognozlash, soliq obyektlarini hisobga olish, mahalliy byudjetlar mutanosibligiga erishish, moliyaviy nazorat bo‘yicha samarali mexanizmlarni takomillashtirish va boshqa yo‘nalishlarda ilg‘or tajriba, texnologiyalar va bilimlarni jalb etish masalalariga alohida e’tibor qaratildi.

Muloqot davomida Rossiya Federatsiyasi soliq organlarining bugungi kundagi rivojlanish darajasi, sohaga axborot kommunikatsiya texnologiyalarini joriy etish, elektron xizmatlar va dasturiy ta’minot vositalari, soliq to‘lovchilarga yaratilgan imkoniyatlar to‘g‘risida batafsil axborot olindi.