Uchrashuvda tomonlar O‘zbekiston Respublikasi va Turkiya Respublikasi o‘rtasida munosabatlar tobora rivojlanib borayotganini, bunda ikki davlat rahbarlarining oliy darajadagi tashriflari, ularda erishilgan kelishuvlar muhim ahamiyat kasb etayotganini ta’kidladilar.

O‘zbekiston Respublikasi Oliy Majlisi Senati Raisi N.Yo‘ldoshev yuqori martabali mehmonni yurtimizga tashrifi bilan qutlar ekan, mazkur tashrif parlamentlararo hamkorlikni yanada chuqurlashtirish va o‘zaro manfaatli kelishuvlarga erishishda alohida ahamiyatga ega bo‘lishini ta’kidladi. Bu, shuningdek, O‘zbekiston Respublikasi Oliy Majlisi bilan Turkiya Respublikasi Buyuk Millat Majlisi o‘rtasida imzolangan hamkorlik to‘g‘risidagi memorandumning amaliy natijasi ekani, parlamentlarimiz a’zolarining muloqoti faollashishi ikki davlatning ko‘pqirrali hamda uzoq muddatli hamkorligini yanada mustahkamlashga hissa qo‘shishini qayd etdi.

Mazkur tashrif doirasida O‘zbekiston Respublikasi Oliy Majlisining Turkiya Respublikasi Buyuk Millat Majlisi bilan hamkorlik bo‘yicha parlamentlararo guruhi va Turkiya Respublikasi Buyuk Millat Majlisining “Turkiya-O‘zbekiston” parlamentlararo do‘stlik guruhining qo‘shma majlisi ham o‘tkazildi.

Majlis yakunlari bo‘yicha amaliy tadbirlar rejasi (“Yo‘l xaritasi”) imzolandi.

Tashrif doirasida, shuningdek, davlat qo‘mitalari va idoralari rahbarlari, OAV vakillari bilan Xalqaro Press-klubning press-kofe formatida qator uchrashuvlar o‘tkazish, Samarqand, Buxoro shaharlarini ziyorat qilish, mamlakatlarimizning parlamentlararo hamkorligini yanada rivojlantirishga qaratilgan hujjatlar imzolanishi nazarda tutilgan.