Namangan viloyati sog‘liqni saqlash muassasalariga joriy yilda davlat byudjetidan 534 milliard 196 million so‘m mablag‘ ajratildi. Bu o‘tgan yilga nisbatan 95 milliard so‘m yoki 22 foiz ko‘pdir.

Jumladan, dori-darmon va tibbiy buyumlar xarid qilish xarajatlariga byudjetdan 46 milliard 926 million so‘m ajratildi. Shundan qishloq vrachlik punktlari, shahar va qishloq oila poliklinikalariga biriktirilgan har bir fuqaro hisobiga dori-darmon vositalari uchun 3 ming 135 so‘mdan xarajat ko‘zda tutilgan. Tibbiyot birlashmalarida bir o‘ringa kuniga 8 ming 544 so‘mdan, tez tibbiy yordam xizmatiga har bir tibbiy chaqiruvga 5 ming so‘mdan ajratilgani ijtimoiy siyosatning ustuvorligidan dalolat beradi. 

Shuni alohida ta’kidlash joizki, o‘tgan yil ambulator poliklinikalarga biriktirilgan har bir fuqaro uchun dori-darmon xarajatlariga me’yor o‘rtacha 1 ming 500 so‘m edi, joriy yilda 3 ming 115 so‘m, tez tibbiy yordam muassasalariga o‘tgan yili dori-darmon xarajatlariga har bir tibbiy chaqiruv uchun me’yor o‘rtacha 1 ming 800 so‘m bo‘lgan bo‘lsa, joriy yilda 5000 so‘m ajratilgan. 

Bundan tashqari, manzilli dastur asosida shahar va tumanlarda skrining xonalari va namunali tug‘ruq bo‘limlarini tashkil etish belgilangan bo‘lib, bu maqsadga byudjetdan qariyb 12,4 milliard so‘m mablag‘ ajratildi. 

Namangan viloyati Uychi tumani tibbiyot birlashmasida o‘tkazilgan o‘quv-seminarda shular haqida batafsil ma’lumot berildi. 

O‘zbekiston Respublikasi Moliya va Sog‘liqni saqlash vazirliklarining tibbiyot muassasalariga ajratilgan byudjet mablag‘larini xarajatlar turi bo‘yicha belgilangan me’yorlarda teng ulushlarda rejalashtirish masalalariga bag‘ishlangan tadbirda viloyat sog‘liqni saqlash boshqarmasi, viloyat ixtisoslashtirilgan tibbiyot muassasa va markazlari, markaziy poliklinikalar, shahar, tuman birlashmalari rahbarlari va bosh hisobchilari, viloyat moliya bosh boshqarmasi rahbar va mutaxassislari ishtirok etdi. 

– Prezidentimizning Oliy Majlisga Murojaatnomasi barcha sohalarda rivojlanishning yangi bosqichini boshlab berdi, – deydi Namangan viloyati sog‘liqni saqlash boshqarmasi boshlig‘i S.Mo‘minov. –Mamlakatimiz moliya tizimi faoliyatida ham davr talabiga xos islohotlar amalga oshirilmoqda. Xususan, byudjet shaffofligini ta’minlash, byudjetdan ajratilayotgan mablag‘larni maqsadli va manzilli yetkazish borasida zarur chora-tadbirlar ko‘rilmoqda. Bu, ayniqsa, sog‘liqni saqlash sohasini moliyalashtirish, ya’ni xalqimiz salomatligini muhofaza qilish masalalariga ajratilayotgan mablag‘lar miqdorining sezilarli darajada o‘sgani misolida ham yaqqol namoyon bo‘lmoqda. Ajratilgan davlat mablag‘idan belgilangan maqsad va me’yorlar doirasida samarali foydalanish masalaning ikkinchi tomoni. Mazkur tadbirdan ko‘zlangan maqsad mas’ullarning bu boradagi vazifalarini yana bir bor aniqlashtirib berishdir. 

Tadbir ishtirokchilari yuqoridagi mablag‘larni muassasalar bo‘yicha aholi va o‘rin kunlaridan kelib chiqib, teng ulushlarda taqsimlash bo‘yicha tavsiyalar bilan tanishtirildi va moliyachi mutaxassislar tomonidan qatnashchilarni qiziqtirgan savollarga batafsil javob qaytarildi.