Qadim Buxoroda birinchi marta havo shari ishga tushirildi. Ushbu tashabbus O‘zbekiston Respublikasi Turizmni rivojlantirish davlat qo‘mitasi, tijorat banklari hamda O‘zbekiston aeronavtika federatsiyasi bilan hamkorlikda amalga oshirildi. Loyiha sayyohlarni jalb qilish uchun kamida to‘rtta havo shari sotib olishni o‘z ichiga oladi. Bu borada banklar bilan birgalikda texnik jihatlar ishlab chiqilgan va yangi havo sharlari sotib olish rejalashtirilgan.

Havo sharlari yordamida sayyohlar qadimiy Buxoro ustidan osmonu falakka ko‘tariladi va ular yarim soat davomida qadimiy shahar gumbazi bo‘ylab 100 metr balandlikdan butun shaharni tomosha qilishlari mumkin bo‘ladi. Bu esa sayyohlarga ajoyib fotosuratlar olish va yaxshi vaqt o‘tkazish imkoniyatini taqdim etadi.

Ma’lumot o‘rnida shuni aytish lozimki, Turizmni rivojlantirish davlat qo‘mitasi havo sharlaridan foydalanish va buni amalga oshirishda har tomonlama qo‘llab-quvvatlash hamda amaliy yordam ko‘rsatish borasida O‘zbekiston aeronavtika federatsiyasi bilan hamkor tashkilot hisoblanadi.