Surxondaryo viloyati Denov tumanidagi Guliston mahallasida yashovchi O‘tmas Mansurov (ism-shariflar o‘zgartirilgan) ichki ishlar idoralari xodimlari tomonidan qo‘lga olindi. 19 yoshida ishlash uchun xorijga chiqib ketgan bu kimsa yurtimizga qaytib kelgach, yurish-turishiyu, xatti-harakati, o‘zini “dono” va gapga “chechan” qilib ko‘rsatishi ko‘pchilikni ajablantirayotgan edi.

Tergovga qadar olib borilgan surishtiruv ishlari chog‘ida uning 2014 yil kuz faslida Moskva shahriga ishlash uchun ketib, yollanma ishchi sifatida mehnat qilgani va hozirda qidiruvda bo‘lgan akasi Safar Salomovning da’vati ta’sirida faoliyati ta’qiqlangan “Jihodchilar” diniy ekstremistik oqimga a’zo bo‘lgani aniqlangan.

Shundan so‘ng, O‘tmas oqim g‘oyalarini qo‘llab-quvvatlab, Rossiya Federatsiyasidan Turkiya davlatiga chiqib ketgan. Suriyada xalqaro terroristik tashkilot safiga borib qo‘shilgan. O‘sha yerda harbiy tayyorgarlikdan o‘tib, ta’qiqlangan tashkilot faoliyatini kengaytirish, kelgusida “jihod” qilish yo‘li bilan O‘zbekiston Respublikasining amaldagi konstitutsiyaviy tuzumiga qarshi faoliyat yuritgan.

Ayni paytda 23 yoshli O‘tmas Mansurovga nisbatan O‘zbekiston Respublikasi Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.

Xolmo‘min Mamatrayimov, O‘zA