Davlat va jamiyat qurilishi tizimini takomillashtirish O‘zbekiston Respublikasini yanada rivojlantirishning birinchi ustuvor yo‘nalishidir.

O‘zbekiston Respublikasi Oliy Majlisi Qonunchilik palatasining 2018-yil 25-yanvarda bo‘lib o‘tgan navbatdagi majlisida deputatlar davlat va jamiyat hayotining barcha sohalarini sifat jihatidan isloh etish jarayonida muhim ahamiyatga ega bo‘lgan bir qator qonun loyihalarini ko‘rib chiqdilar. 

Chunonchi, parlament a’zolari ikkinchi o‘qishda “Davlat xaridlari to‘g‘risida”gi qonun loyihasini muhokama qildilar. Loyiha davlat xaridlarini tartibga soluvchi hamda amaldagi mavjud qarama-qarshiliklarni va eskirgan normalarni bartaraf etishga qaratilgan to‘g‘ridan-to‘g‘ri ta’sir kuchiga ega yagona qonun hujjatini o‘zida kasb etadi. 

Qonun loyihasini maromiga yetkazish jarayonida ekspert birlashmasi bilan maslahatlar olib borildi. Deputatlar tomonidan O‘zbekiston Respublikasi Prezidenti huzuridagi Loyiha boshqaruvi milliy agentligi, Bosh prokuratura, Axborot va kommunikatsiya texnologiyalarini rivojlantirish vazirligi, biznes, shuningdek, fuqarolik jamiyati institutlari vakillari bilan birgalikda qonun loyihasi oxirgi tahriri ishlab chiqildi. Ushbu sohadagi xalqaro tajriba o‘rganildi. 

Majlisda ta’kidlanganidek, maromiga yetkazish jarayonida qabul qilinayotgan qonunning amaliy ahamiyatini oshirishga alohida e’tibor qaratildi. Korruptsiyaga qarshi kurashishga yo‘naltirilganlik, davlat xaridlari bozorida tadbirkorlik subyektlarining halol raqobatli kurashi uchun sharoitlar yaratish, ushbu sohada davlat va jamoatchilik nazoratining ta’sirchan mexanizmlarini ta’minlash maqsadida davlat xaridlarini elektron shaklga o‘tkazish loyiha qoidalarining muhim jihatlaridir. 

Deputatlarning fikriga ko‘ra, ushbu qonunning qabul qilinishi byudjet mablag‘laridan va boshqa markazlashtirilgan manbalardan, kredit resurslaridan Hukumat kafolati ostida imkon qadar samarali hamda oqilona foydalanishga xizmat qiladi. Bundan tashqari, davlat sektori ma’qul muddatlarda “narx-sifat” o‘rtasida maqbul nisbat bo‘lgan holda zarur tovarlar, ishlar va xizmatlar bilan ta’minlanadi. 

Qonunning amalga oshirilishi mamlakatimiz ijtimoiy-iqtisodiy rivojlanishi jadallashuviga ham imkon berishi qayd etildi. Mahalliy ishlab chiqaruvchilar va kichik biznes subyektlari huquqlari hamda qonuniy manfaatlarini ta’minlash, davlat xaridlari sohasidagi munosabatlarni tartibga solishning zamonaviy uslublarini qo‘llash orqali ishlab chiqarilayotgan mahsulot sifatini oshirish borasida salmoqli ko‘mak oladi. 

Muzokaralar davomida deputatlar qonun loyihasi normalarini takomillashtirish yuzasidan o‘z taklif va tavsiyalarini bildirdilar. Xususan, takliflar davlat xaridlari tartib-taomilini amalga oshirish, shartnoma tuzish va uni ijro etish, yetkazib beruvchi va buyurtmachi o‘rtasida yuz berishi mumkin bo‘lgan nizolar hamda kelishmovchiliklar ustidan shikoyat qilish, ularni hal etish chog‘ida shaffoflikni ro‘yobga chiqarishga tegishlidir. 

Shundan so‘ng “Davlat xaridlari to‘g‘risida”gi qonun qabul qilindi va Oliy Majlis Senatiga yuborildi. 

Shuningdek, majlisda Oliy Majlis Qonunchilik palatasi vakolatlariga taalluqli boshqa masalalar ham ko‘rib chiqildi. 

O‘zbekiston Respublikasi Oliy Majlisi
Qonunchilik palatasining
Axborot xizmati