– Mazkur tadbirlar Prezidentimiz topshirig‘i bilan butun mamlakatimiz bo‘ylab o‘tkazilmoqda, – deydi O‘zbekiston Respublikasi favqulodda vaziyatlar vaziri Rustam Jo‘rayev. – Bundan maqsad, kuz-qish mavsumini betalafot o‘tkazish va yuz berishi mumkin bo‘lgan texnogen va tabiiy ofatlarning tezkorlik bilan oldini olishdir. Tadbirlar davomida Respublika ishchi guruhi tomonidan Qashqadaryo viloyatida favqulodda vaziyatlar davlat tizimiga kiritilgan barcha idora va tashkilotlarning kuz-qish mavsumiga tayyorgarligi tekshirilmoqda. Bugungi taktik o‘quv mashg‘ulotida tashkilot va muassasalarning mavsumga tayyorgarligi, favqulodda vaziyatlar sodir bo‘lganda ularni tezlik bilan bartaraf qilish ko‘nikmasi sinovdan o‘tkazildi. Viloyatda taktik mashg‘ulotga yaxshi tayyorgarlik ko‘rilgan. Ammo, texnikalar holati, xodimlar bilimi bilan bog‘liq kamchiliklar yo‘q emas. Qashqadaryo viloyati texnogen va tabiiy favqulodda holatlar tez-tez sodir bo‘ladigan hudud hisoblanadi. Shu bois, is gazi va tabiiy gazdan zaharlanish holatlarining oldini olish, xavfsizlik masalasiga rioya qilish borasida aholi bilan uchrashuvlar, maxsus o‘quv-taktik mashg‘ulotlar, targ‘ibot-tashviqot tadbirlari muntazam tashkil etilmoqda. 

Mashg‘ulotlar davomida viloyat hududiy gaz ta’minoti filiali, “Qashqadaryo hududiy elektr tarmoqlari” aksiyadorlik jamiyati va “Qashqadaryo ko‘mir yetkazuvchi” unitar korxonasining kuz-qish mavsumini betalafot o‘tkazishga jalb etiladigan kuch va vositalari, shuningdek, favqulodda vaziyatlar boshqarmasi qutqaruv otryadi, viloyat yong‘in xavfsizligi boshqarmasi va tez tibbiy yordam xizmati kuch vositalari namoyishi ham o‘tkazildi. 

Tadbirda Qashqadaryo viloyati hokimi Z.Ro‘ziyev ishtirok etdi.