Ko'rinish
Shrift o'lchami
?
Ekran suxandoni
Ishlab chiqilgan: 
O`zbekiston Respublikasi
Hukumat portali
Joriy yilning o‘tgan davrida Namanganda 161 kilometrdan ziyod elektr uzatish tarmog‘i yangilandi
2017-10-12 | Jamiyat
Namangan viloyatida elektr energiyasi ta’minotini yaxshilash maqsadida elektr uzatish tarmoqlari, transformator podstansiyalari va punktlarini modernizatsiya qilish va texnik yangilashga alohida e’tibor qaratilmoqda.
Prezidentimizning 2016-yil 23-noyabrdagi “2017-2021-yillarda past kuchlanishli elektr tarmoqlarini yangilash va modernizatsiya qilish dasturi to‘g‘risida”gi qarori bu borada muhim dasturilamal bo‘lmoqda.
Ushbu hujjat ijrosi doirasida viloyatda 25 milliard 98 million so‘mlikdan ziyod modernizatsiya ishlarini amalga oshirish rejalashtirilgan. Jumladan, 2017-yilda 270 kilometrga yaqin elektr uzatish tarmog‘i modernizatsiya, 127 transformator punkti rekonstruksiya qilinadi, yangilari quriladi.
“Namangan hududiy elektr tarmoqlari korxonasi” aksiyadorlik jamiyati tomonidan joriy yilning o‘tgan davrida 161 kilometrdan ziyod elektr uzatish tarmog‘i yangilanib, 55 turli quvvatdagi transformator punkti rekonstruksiya qilindi, 8 milliard 845 million so‘mlikdan ziyod modernizatsiya ishlari bajarildi. Bu 11 mingga yaqin xonadonni uzluksiz elektr energiyasi bilan ta’minlash imkonini beradi.
Namangan shahrida 19 kilometr havo tarmog‘ining yangilanishi va 15 transformator podstansiyasi rekonstruksiya qilinishi natijasida Shodlik, Mashad, Majnuntol, Gulpora, Bahor singari 20 dan ortiq mahallada aholi va ulgurji iste’molchilarning elektr energiyasi ta’minoti yaxshilandi. Xususan, Kelajak tongi mahallasida 2,5 kilometrdan ziyod elektr uzatish tarmog‘i tortilib, yangi podstansiya qurildi. Oltitosh mahallasida 9 kilometr uzunlikdagi havo tarmog‘i rekonstruksiya qilindi va 5 ta 160 kVt.li transformator o‘rnatildi.
Bunday chora-tadbirlar viloyatning barcha tumanlarida amalga oshirilmoqda. Mingbuloq, Kosonsoy, Norin, Pop, To‘raqo‘rg‘on, Uychi, Uchqo‘rg‘on, Chortoq tumanlarining qator qishloqlarida 80 kilometrga yaqin elektr uzatish tarmog‘i rekonstruksiya qilindi, 6 kilometrdan ko‘proq yangi tarmoq tortildi va 20 dan ziyod turli transformator qurilmalari o‘rnatildi.
Dastur ijrosini ta’minlash borasida olib borilayotgan ishlar bilan birgalikda korxona tomonidan kuz-qish mavsumiga tayyorgarlik ko‘rish, kam ta’minlangan oilalar, harbiy xizmatchilar, yoshlar uchun qurilayotgan uy-joylarni elektrlashtirish bo‘yicha ishlar ham reja asosida izchil davom ettirilmoqda.
– Mazkur dastur ijrosini ta’minlashda joylarda aholi bilan o‘tkazilayotgan ochiq muloqotlarda tushayotgan murojaatlar asosida ishni tashkil qilishga alohida e’tibor qaratilmoqda, – deydi “Namangan hududiy elektr tarmoqlari korxonasi” AJning umumiy masalalar bo‘yicha direktori S.Husainov. – Hozirgacha dasturga kiritilgan elektr tarmoqlarini yangilash bo‘yicha ishlar 61,5 foizga, transformatorlarni rekonstruksiya qilish 43,3 foizga bajarildi va bu boradagi ishlar davom ettirilmoqda. 2021-yilgacha mo‘ljallangan modernizatsiya ishlari belgilangan muddatda yakunlanadi.
