2017-yilning 3-oktabr kuni O‘zbekiston Respublikasi Tashqi ishlar vaziri Abdulaziz Kamilov Buyuk Britaniya Parlamenti Lordlar palatasi a’zosi, “Britaniya-O‘zbekiston” Parlament hampartiyaviy guruhi raisining o‘rinbosari, lord Iltaf Shayxni qabul qildi. Mehmon Toshkentga Jahon iqtisodiyoti va diplomatiya universiteti tomonidan o‘tkazilgan “O‘zbekistonning tashqi siyosati Harakatlar strategiyasi doirasida” xalqaro “davra suhbati”da ishtirok etish uchun tashrif buyurgan.

Tashqi ishlar vazirligidagi suhbat chog‘ida O‘zbekiston-Buyuk Britaniya aloqalarini yanada rivojlantirish va unga yangi dinamika berish masalalari muhokama qilindi.

Ta’kidlanganidek, parlamentlararo muloqot ikki tomonlama munosabatlarning muhim tarkibiy qismi bo‘lib, u savdo-iqtisodiy, sarmoyaviy, madaniy-gumanitar va boshqa sohalardagi hamkorlikni mustahkamlashda rag‘batlantiruvchi ta’sir ko‘rsatadi.

Muzokaralar chog‘ida hamkorlikdagi bo‘lajak tadbirlar, jumladan London shahrida Savdo va sanoat bo‘yicha O‘zbekiston-Buyuk Britaniya kengashining navbatdagi majlisini o‘tkazish yuzasidan fikr almashildi.