Bugun Germaniyaning Gamburg shahridagi «Sporthalle» sport majmuasida boks bo‘yicha kattalar o‘rtasida jahon chempionati bahslari boshlanadi. 

Unda dunyoning 85 davlatidan kelgan eng kuchli 280 bokschi 10 vazn toifasida g‘oliblik uchun kuch sinashadi. Mazkur chempionatda O‘zbekiston terma jamoasi to‘liq tarkibda qatnashadi. 

Sanjarbek Tursunov bugun 91 kilogramm vazn toifasida bo‘lib o‘tadigan bahsda nikaragualik Jeferiy Gonzalezga qarshi ringga ko‘tarilsa, 26-avgust kungi bellashuvlarda 52 kilogrammda iste’dodli bokschimiz Jasur Latipov puerto-rikolik Yankiyel Figuyeroa River bilan raqobatlashadi. 

Bosh murabbiy Marat Qurbonov qo‘l ostidagi terma jamoamiz a’zolari Hasanboy Do‘smatov, Murodjon Ahmadaliyev, Elnur Abduraimov, Iqboljon Xoldorov, Shahram G‘iyosov, Isroil Madrimov, Bektemir Meliqo‘ziyev, Bahodir Jalolov bahslarga ikkinchi davradan qo‘shiladi.