Farg‘ona shahrida Xalqaro tennis federatsiyasi tomonidan xotin-qizlar o‘rtasida o‘tkazilgan turnirda mamlakatimiz sharafini himoya qilgan Sabina Sharipova hamda Nigina Abduraimova shohsupaning eng yuqori pog‘onasidan joy egalladi.

Musobaqaning yakkalik bahslarida Sabina Sharipova final uchrashuvida rossiyalik Yelena Ribakinani 6:4, 7:6 hisobida mag‘lubiyatga uchratdi va bosh sovrinni qo‘lga kiritdi. 

Turnirning juftlik bahslarida Nigina Abduraimova rossiyalik Anastasiya Frolova bilan birga finalda Sabina Sharipova hamda rossiyalik Kseniya Likinaga qarshi kortga tushdi. Keskin va murosasiz tarzda o‘tgan o‘yinda Nigina va Anastasiya juftligi 7:6, 7:5 hisobida zafar quchdi.