"Anhor-Lokomotiv" ana shunday fayzli maskanlardan. Bu yerdagi zamonaviy attraksionlar, mo‘jaz kinoteatr, avtomatlashtirilgan o‘yin qurilmalari dam olishning zavqli o‘tishida alohida ahamiyat kasb etadi. Tarixiy shaharlarimizdagi yodgorlik majmualarining mo‘jaz maketlari, musiqali favvoralar ushbu maskanga o‘zgacha fayz va tarovat bag‘ishlaydi. Suvdagi attraksionlar, sun’iy havza dam oluvchilar bilan gavjum. 

Yozgi ta’til avj pallaga chiqqan shu kunlarda bog‘da Mehribonlik uylari, serfarzand oilalarning o‘g‘il-qizlari uchun rang-barang ma’rifiy dasturlar, intellektual o‘yinlar, viktorinalar, ijodiy ko‘rik-tanlovlar muntazam tashkil etilmoqda. Turli aksiyalar, ko‘ngilochar o‘yinlar, mahorat darslari, bolalar badiiy jamoalari ishtirokidagi konsert dasturlari maktab o‘quvchilarining yozgi ta’til kunlari yanada qiziqarli o‘tishini ta’minlamoqda.