Ko'rinish
Shrift o'lchami
?
Ekran suxandoni
Ishlab chiqilgan: 
O`zbekiston Respublikasi
Hukumat portali
Ofitserlar xizmatga yo‘l oldi
2017-06-20 | Jamiyat
O‘zbekiston Respublikasi Ichki ishlar vazirligi Harbiy-texnika institutida bitiruvchilarga diplom topshirish va harbiy unvon berishga bag‘ishlangan marosim bo‘lib o‘tdi. Unda keng jamoatchilik vakillari, bitiruvchi kursantlarning ota-onalari, yaqinlari ishtirok etdi.
Ichki ishlar vaziri A.Azizov, institut boshlig‘i H.Mamatov va boshqalar mamlakatimizda ichki ishlar tizimini isloh qilish, sohani yuksak malakali, professional kadrlar bilan ta’minlash, ta’lim dargohlarida o‘qitishning zamonaviy usul va vositalaridan keng foydalanishga alohida e’tibor qaratilayotganini ta’kidladi.
Toshkent oliy harbiy-texnik bilim yurti sifatida faoliyat ko‘rsatgan ta’lim dargohi davlatimiz rahbari Shavkat Mirziyoyevning 2017-yil 10-apreldagi «Ichki ishlar organlarining faoliyati samaradorligini tubdan oshirish, jamoat tartibini, fuqarolar huquqlari, erkinliklari va qonuniy manfaatlarini ishonchli himoya qilishni ta’minlashda ularning mas’uliyatini kuchaytirish chora-tadbirlari to‘g‘risida»gi farmoniga asosan Harbiy-texnika institutiga aylantirildi.
Bu ichki ishlar organlari xodimlarini tayyorlash, qayta tayyorlash va ularning malakasini oshirish tizimini tubdan qayta ko‘rib chiqish imkonini berib, yosh ofitserlarning harbiy va sohaviy bilimlarini mustahkamlashga xizmat qilmoqda.
Ixtisoslashtirilgan modellashtirish va simulatsiya markazida kursantlar maxsus komputer texnologiyalari yordamida jangovar vaziyatlarga maksimal yaqinlashtirilgan sharoitlarda tajriba oshiradi. Sport bazasida nafaqat jismonan, balki ruhan tetik kursantlar tarbiyalanmoqda.
Institutda panoramali komputerlashtirilgan o‘q otish trenajyori faoliyati yo‘lga qo‘yilgan bo‘lib, ushbu texnologiya turli jangovar vaziyatlarda tezkorlik bilan taktik rejalarni ishlab chiqish va bo‘linmalarni mohirona boshqarish ko‘nikmalarini egallashga yordam beradi. Kursantlar uchun axborot-resurs markazi xizmatda.
– O‘g‘lim Abdug‘ani mazkur ta’lim dargohida o‘qishni tamomlab, ofitser degan sharafli nomga sazovor bo‘ldi, – deydi Hafiza Ahmedova. – Bitirayotgan yoshlar xalqimiz osoyishtaligini saqlashdek muqaddas burchini ado etishga yo‘l olmoqda. Bundan biz ota-onalar faxrlanamiz. Yoshlarimizga shunday sharoitlarni yaratib bergan davlatimizdan, Prezidentimizdan minnatdormiz.
Tadbir so‘ngida konsert dasturi namoyish etildi.
