2017-yilning 11-may kuni O‘zbekiston Respublikasi Tashqi ishlar vazirligida O‘zbekiston-Qozog‘iston vazirliklararo maslahatlashuvlari bo‘lib o‘tdi. Unda qatnashish uchun Qozog‘iston Respublikasi Tashqi ishlar vazirligi Konsullik xizmati departamenti direktori Ardak Madiyev boshchiligidagi delegatsiya Toshkent shahriga tashrif buyurdi.

Konstruktiv ruhda o‘tgan maslahatlashuvlar chog‘ida konsullik sohasidagi ikki tomonlama munosabatlarning hozirgi holati atroflicha muhokama qilindi, tomonlar fuqarolarining huquq va erkinliklarini himoya qilish, fuqarolik, oilaviy va jinoyat ishlari bo‘yicha huquqiy yordamning amaliy jihatlari, O‘zbekiston bilan Qozog‘iston o‘rtasidagi kelishuvlar hamda xalqaro konvensiyalarning bajarilishi ko‘rib chiqildi.

Uchrashuvda delegatsiyalar mazkur sohada, jumladan migratsiya masalalari bo‘yicha ikki davlat qonunchiligida kuchga kirgan o‘zgartirishlar to‘g‘risidagi ma’lumotlar bilan ham almashishdi.