Qarshi shahrida tennis bo‘yicha xalqaro turnir qizg‘in davom etmoqda. 

Xotin-qizlar o‘rtasidagi yakkalik bahslari birinchi davrasida mamlakatimizning kuchli tennischilaridan biri Nigina Abduraimova ruminiyalik Mixaela Buzarnesku bilan kuch sinashdi. Uchrashuvning birinchi setida 7:6 hisobida g‘alaba qozongan Nigina ikkinchi setda tay-brekda imkoniyatni boy berib qo‘ydi. Keskin va murosasiz bahslarga boy o‘tgan uchrashuvning so‘nggi hal qiluvchi setida tennischimiz 6:3 hisobida g‘alaba qozonib navbatdagi bosqichga yo‘l oldi. U ikkinchi davrada rossiyalik Anastasiya Forlova bilan raqobatlashadi. 

Turnirning ikkinchi davrasida sportchilarimizdan Sanjar Fayziyev belaruslik Sergey Betov, Jo‘rabek Karimov rossiyalik Bogdan Bobrov, Temur Ismoilov rossiyalik Yevgeniy Tyurnevga qarshi kortga chiqadi.