Ташқи ишлар вазирлигида АҚШ Элчиси билан учрашув бўлиб ўтди

Ўзбекистон Республикаси Президентининг Афғонистон бўйича Махсус вакили Исматулла Иргашев Америка Қўшма Штатларининг Фавқулодда ва мухтор элчиси Жонатан Девид Ханник билан музокаралар олиб борди. 

Учрашув давомида томонлар Афғонистондаги мавжуд вазиятни, Афғонистон йўналишида Ўзбекистон-Америка мулоқотини ривожлантириш истиқболларини муҳокама қилдилар.

Элчи Ўзбекистон Раҳбариятининг Афғонистон халқига гуманитар ёрдам кўрсатиш бўйича олиб бораётган сиёсатига юксак баҳо берди. Шунингдек, Афғонистон муаммосини тинч йўл билан ҳал этиш масаласида Ўзбекистон ва Қўшма Штатлар ўртасида янада яқин ҳамкорлик қилиш муҳимлиги таъкидланди. 

Томонлар Афғонистонда миллий ярашувга имкон қадар тезроқ эришиш, шунингдек, мамлакатнинг янги ҳукумати томонидан жаҳон ҳамжамияти олдидаги мажбуриятларини бажариш зарурлиги тўғрисида келишиб олдилар.

Манба: Ўзбекистон Республикаси Ташқи ишлар вазирлиги