Хабар берганимиздек, Олимпия ўйинлари ғолиби, Осиё ва Жаҳон чемпиони Баҳодир Жалолов профессионал боксда навбатдаги рейтинг жангини АҚШнинг Верона шаҳрида муваффақиятли ўтказди.

Жаҳон профессионал бокс оламида "Big Uzbek" номи билан танилган Жалолов 8 раундлик жангда бельгиялик Жек Муловайини сўнгги раундда нокаутга учратди ва ғалабасини тантана қилди.

Бу Баҳодирнинг профессионал боксдаги 11-жанги ва 11-ғалабаси бўлди.

Бугун, 13 июнь тонгда енгилмас боксчимиз Баҳодир Жалолов АҚШдан Ўзбекистонга қайтиб келди.

Уни Ислом Каримов номидаги Тошкент Халқаро аэропортида Спортни ривожлантириш вазири ўринбосари Шаҳрулло Маҳмудов, Миллий Олимпия қўмитаси Бош котиби Ойбек Қосимов, Ўзбекистон бокс ва профессионал бокс федерацияларининг мутасаддилари, спортчининг яқинлари, кенг жамоатчилик вакиллари тантанали кутиб олди.

Кутиб олиш маросимида Баҳодир Жалолов рейтинг жангларидаги ғалабалари орқали тез орада оғир вазн тоифасида чемпионлик камари учун рингга кўтарилишга тайёргарлик кўраётганлигини таъкидлади.

Айтиш лозим, ушбу жангга қадар Баҳодир Жалолов WBC 40 талик рейтингда ўз йўналиши бўйича кучли 30 таликда қайд этиб келинаётганди.

Профессионал боксдаги 11 та жангининг барчасини муддатидан аввал нокаут билан якунлашга одатланган Жалолов бельгиялик Жек Муловайини мағлуб этганидан сўнг рейтингдаги ўз мавқеи ва жойлашув поғонасини янада яхшилаши шубҳасиз.

Нима бўлганда ҳам, бугун дунё профессионал бокс матбуоти, турли ижтимоий тармоқларда катта рингга "Big Uzbek" кириб келаётганлигини эътироф этмоқда.

Тўлқин Рўзиев

Манба: ЎзА