“Beeline” бренди остида фаолият юритувчи “Veon” компаниялар гуруҳи Ўзбекистонда “Тошкент-Самарқанд” йўналиши бўйича модернизация қилинган гипертезликдаги транспорт каналини ишга туширди
Бугун, 25 март куни Ахборот технологиялари ва коммуникацияларини ривожлантириш вазири Шерзод Шерматов “Veon” компаниялар гуруҳи бош ижрочи директори Каан Терзиоглу билан учрашди. Йиғилишда такидланганидек, мамлакатимизда телекоммуникатсия хизматлари бозорини янада ривожлантириш, АКТ соҳасига сармоя жалб этиш, хусусан, уяли алоқа операторларининг самарали фаолият юритиши учун кенг имкониятлар яратилган.
Учрашувда “Рақамли Ўзбекистон – 2030” стратегиясини амалга ошириш доирасида “Veon” компаниялар гуруҳи билан ҳамкорликни янада кенгайтириш масалалари муҳокама қилинди.
БПО ва КПО хизматларини ривожлантириш лойиҳаларини амалга оширишда ҳамкорликни кучайтиришга алоҳида эътибор қаратилди.
Таъкидланганидек, бугунги кунда Ўзбекистонда хорижий IT-компаниялар ва резидентлар учун барча шароитлар яратиб берилмоқда. Масалан, IT Парк резиденти бўлган хорижий IT-компанияларга инфратузилма ва солиқ имтиёзлари тақдим этилган. Хорижий IT-мутахассислар ва уларнинг оила аъзолари учун виза олишнинг соддалаштирилган “IT Visa” тизими жорий этилди. Вазирлик раҳбарияти томонидан “Veon” компаниялар гуруҳи мутахассисларини Ўзбекистонга жалб қилиш ва кўчириш таклифлари берилди.
Муҳим вазифалар қаторида замонавий телекоммуникатсия инфратузилмасини яратиш ҳам бор. Бугунги кунда Ўзбекистонда “Veon” компаниялар гуруҳи иштирокида ускуналарни модернизатсия қилиш ва фойдаланувчилар учун қулайликлар яратишга қаратилган лойиҳалар амалга оширилмоқда.
Шу мақсадда йиғилиш доирасида икки шаҳар ўртасида абонент трафигини 600 Гбит/с тезликда узатувчи модернизатсия қилинган “Тошкент-Самарқанд” гипертезкор транспорт каналининг рамзий ишга тушириш маросими ҳам бўлиб ўтди. Бу операторнинг мобил хизматларидан фойдаланувчилар учун ижобий қулайлик яратади. Бу “Beeline Узбекистан” тарихида шундай сиғимга эга бўлган биринчи каналдир.
Томонлар ҳамкорликни ривожлантириш учун юқори салоҳият мавжудлигини қайд этиб, ахборот технологиялари соҳасида шерикликни ривожлантириш учун барча саъй-ҳаракатларни сафарбар этишга тайёр эканликларини билдирдилар.
Манба: Ўзбекистон Республикаси Рақамли технологиялар вазирлиги
