Кўриниш
A
A
A
Шрифт ўлчами
?
Экран сухандони
Ишлаб чиқилган: 
Ўзбекистон Республикаси
Ҳукумат портали
Ўзбекистон Республикаси мудофаа вазири Қозоғистон ҳарбий делегациясини қабул қилди
2021-11-22 | Хавфсизлик соҳаси
Бугун, 22-ноябр куни Ўзбекистон мудофаа вазири генерал-лейтенант Баҳодир Қурбонов Қозоғистон мудофаа вазири генерал-лейтенант Мурат Бектанов бошчилигидаги ҳарбий делегацияни қабул қилди.
Учрашувда томонлар мудофаа соҳасидаги ўзаро манфаатли ҳамкорлик алоқаларининг бугунги ҳолати ва истиқболларини муҳокама қилиб, уни янада кучайтириш борасида фикрлар билан алмашдилар. Хусусан, Қозоғистонда бўлиб ўтган “Қалқон-2021” ҳамда Ўзбекистонда давом этаётган “Ҳамкорлик-2021” қўшма ўқувларининг аҳамияти, бўлинмаларнинг жанговар тайёргарлик масалаларига атрофлича тўхталиб ўтишди.
Мулоқот давомида қардош халқларнинг бирдамлиги, икки томонлама ҳарбий ва ҳарбий-техник ҳамкорлик масалаларининг жорий ҳолати ҳамда истиқболлари, минтақавий хавфсизлик масалалари муҳокама этилди.
Учрашув сўнгида Ўзбекистон ва Қозоғистон мудофаа вазирликлари ўртасида ҳарбий соҳада ҳамкорлик бўйича қатор тадбирларни ўз ичига олган битим имзоланди.
Мазкур ташриф давомида Қозоғистон ҳарбий делегациясининг пойтахтимиздаги «Ғалаба боғи” ёдгорлик мажмуаси, Мудофаа вазирлиги “Чимён” тоғ тайёргарлиги ўқув-машқлар маркази ва Қуролли Кучлар Академияси фаолияти билан танишуви ҳамда Жануби-ғарбий махсус ҳарбий округининг “Термиз” дала ўқув майдонида ўтказилаётган “Ҳамкорлик-2021” ўзбек-қозоқ ўқувларини кузатуви ҳам режалаштирилган.
Манба: Ўзбекистон Республикаси Мудофаа вазирлиги
