Жорий йилнинг 9 июн куни Давлат статистика қўмитасида видеоконференсалоқа тарзида “Гендер тенгликка эришиш стратегияси – мазмун ва моҳият” мавзусида семинар бўлиб ўтди.

Унда Ўзбекистон Республикаси Олий Мажлиси Сенатининг Хотин-қизлар ва гендер тенглик масалалари қўмитаси раиси Малика Қодирхонова, Давлат статистика қўмитаси раиси ўринбосари Махмуджон Зиядуллаев, Бандлик ва меҳнат муносабатлари вазирлиги вакилллари ҳамда журналистлар иштирок этди. 

Сенатор М. Қодирхонова Ўзбекистон Республикаси Олий Мажлиси Сенатининг ўн бешинчи ялпи мажлисида кўриб чиқилган Ўзбекистон Республикасида 2030 йилга қадар гендер тенгликка эришиш стратегияси тўғрисида алоҳида тўхталиб ўтди. Хусусан, мамлакатимизда сўнгги йилларда Гендер тенглик масаласи давлат сиёсати даражасига кўтарилиб, соҳага оид 25 та қонун ҳужжати қабул қилингани, сиёсий партиялардаги хотин-қизлар улуши 44 фоизга, олий таълим соҳасида 40 фоизга, тадбиркорликда 35 фоизга етгани, хотин-қизлар ахборот-коммуникатция, инноватция, энергетика, мухандислик соҳаларига кенг жалб этилаётгани юзасидан маълумот берди. 

Қайд этилганидек, бошқарув лавозимидаги хотин-қизлар улуши 27 фоизга етди. 81 та вазирлик ва идорада илғор ва билимли аёллардан иборат 15 минг нафардан ортиқ кадрлар захираси шакллантирилган. Давлат статистика қўмитаси ходимлари гендер тенгликка эришиш стратегияси бўйича ўз фикр-мулоҳазаларини билдиришди. Такидланганидек, ушбу стратегия эркаклар ва аёлларнинг тенг ҳуқуқлари ва имкониятларини рўёбга чиқариш учун шарт-шароит яратиш ҳамда инсоннинг фундаментал ҳуқуқларига риоя қилиш мақсадида иқтисодий, сиёсий ва ижтимоий ҳаётда гендер тенглик тарғиб қилинишини таъминлашга хизмат қилади. 

Манба: Ўзбекистон Республикаси Президенти ҳузуридаги Статистика агентлиги