Ички ишлар вазирлиги Вазирлар Маҳкамасининг “Транспорт воситалари эгаларининг фуқаролик жавобгарлигини мажбурий суғурта қилиш қоидаларига ўзгартиришлар ва қўшимчалар киритиш ҳақида”ги қарори лойиҳасини умумий муҳокамага қўйди.

“Йўл-транспорт ҳодисаси ҳақидаги билдиришнома – суғурталовчи томонидан бериладиган, йўл-транспорт ҳодисаси содир бўлганлиги ҳақида суғурталовчига хабар бериш учун мўлжалланган, йўл-транспорт ҳодисасида иштирок этган ҳайдовчилар томонидан тўлдириладиган бланк”, - дейилган ҳужжатда.

Қоидаларнинг 11, 34, 34¹ 37 ва 38-бандлари йўл-транспорт ходисани ҳуқуқни муҳофаза қилувчи органлари ходими иштирокисиз расмийлаштиришга оид қоидалар билан тўлдирилади.

Хабарнома бланкасини тузиш орқали йўл-транспорт ҳодисаси тўғрисида ҳужжатларни ҳуқуқни муҳофаза қилиш органлари ходими иштирокисиз расмийлаштириш тартибини белгилаш мақсадида Қоидалар V¹ боб билан тўлдирилади.

Шунингдек, йўл-транспорт ходисаси ҳақидаги билдиришнома бланкаси намунаси қоидаларга илова бўлиб киритилади.

“Йўл-транспорт ҳодисаси ҳақидаги билдиришномани (Европротокол) амалиётга жорий этилиши муносабати билан биринчи навбатда йўл ҳаракати хавфсизлиги ходимлари ва ҳайдовчилар ўртасидаги бевосита мулоқотни амалга оширишда “инсон омили”га ва ортиқча қоғозбозчиликка чек қўйилади ва фуқароларнинг ортиқча сарсонгарчиликлар олди олинади.

Ҳар бир содир этилган йўл-транспорт ҳодисасини расмийлаштириш учун йўл-патруль хизмати инспекторларининг ўртача 2-3 соат вақтини тежалиши орқали тан жароҳати билан боғлиқ ЙТҲлар билан боғлиқ ишларни кўриб чиқиш сифат даражасини ошириш, шунингдек, автомобил йўллардаги тирбандликларни олдини олишда самара беради”, - дейилган ҳужжатда.