Тошкент Фотосуратлар уйида 8 март – Халқаро хотин-қизлар кунига бағишланган кўргазма намойиши бошланди.

Анъанавий ўтказиб келинадиган ушбу кўргазма экспозициясида 60 га яқин сараланган асар намойиш этилмоқда. Кўргазмадан таниқли фотографлар билан биргаликда ҳаваскор ижодкорларнинг ҳам фотосуратлари ўрин олган.

– Аёл – тилсим, унинг ҳар бир характерида янги гўзалликни кўриш мумкин, – дейди санъатшунос Шаҳноза Бегимова. – Кўргазмада намойиш этилаётган фотоларда турли касбда фаолият юритаётган аёллар нафосати акс этган. Аёлларнинг порлоқ нигоҳи, ним табассуми, нозик ҳаракати ва латофати барқ уриб турибди. Аёл гулга қиёсланади. Унинг гўзаллиги боқий табиатга менгзалади, кайфияти ва нозик характери табиат ҳодисотларига ўхшатилади. Шу боис, кўргазма асарларида ёмғирдаги лолалар, камалак жилосидаги ранг-баранг гуллар ҳам акс эттирилган.

Кўргазма 10 мартга қадар давом этади.

Дилобар Маматова, мухбир. Темур Мамадаминов (сурат), ЎзА

Манба: ЎзА