Сув хўжалиги вазирлигида Сингапурнинг “Indorama Corparation Pte. Ltd” компанияси директори Пракаш Кежривал бошчилигидаги делегация аъзолари билан учрашув ўтказилди.

Учрашувда Ўзбекистон Республикаси Вазирлар Маҳкамасининг 2018 йил 8 августда  қабул қилинган “Ўзбекистон Республикасида “Индорама” (Сингапур) компанияси томонидан замонавий пахта-тўқимачилик ишлаб чиқаришни ташкил этиш чора-тадбирлари тўғрисида”ги қарорида белгиланган вазифалар муҳокама қилинди.

Қарорга асосан “Ўзбекистон Республикасида замонавий пахта-тўқимачилик ишлаб чиқаришини ташкил этиш” лойиҳаси доирасида 2019–2023 йилларда 340 миллион доллар миқдорида тўғридан-тўғри хорижий инвестицияларни ўзлаштириш назарда тутилган. Шу мақсадда, Сингапур компанияси Сирдарё вилоятининг Сардоба ва Оқолтин, Қашқадарё вилоятининг Нишон ва Касби туманларида қарийб 50 минг гектар майдонда пахта хомашёсини етиштириш режалаштирилган.

Учрашувда томонлар мазкур ҳудудларда ерларнинг мелиоратив ҳолатини яхшилаш, ирригация ва дренаж тармоқларини тозалаш ва таъмирлаш, экинларни ўз вақтида ва кафолатли сув билан таъминлаш масалаларини муҳокама қилдилар.

Манба: Ўзбекистон Республикаси сув хўжалиги вазирлиги