Россия Федерацияси Свердловск вилояти губернатори Евгений Куйвашев бошчилигидаги делегация 24 ноябрь куни Наманган вилоятига келади.

70 нафардан зиёд Свердловск вакилларидан иборат делегация таркибидан вилоят губернатори ўринбосари, вазирлар, ҳамда вилоятдаги йирик компаниялар раҳбарлари, санъаткорлар ўрин олади.

24-26 ноябрь кунлари амалга ошириладиган ташриф доирасида Наманган вилояти ҳамда Свердловск вилояти ўртасида икки томонлама савдо-иқтисодий, илмий-техникавий, гуманитар ва бошқа соҳалардаги ҳамкорлик бўйича келишув имзоланади.

Наманган ва Свердловск вилоятлари ишбилармон доиралари вакиллари B2B учрашувлар бўлиб ўтади. Музокаралар якуни бўйича келишув ва шартномалар имзоланиши кўзда тутилган.

Свердловск вилояти делегацияси, Наманган давлат университетида ташкил этилган Урал давлат тиббиёт университети қўшма тиббиёт факултетига талабаликка қабул қилиш маросимида ҳам иштирок этади.

Ташриф кунлари Наманган шаҳрида вилоятда ишлаб чиқарилган маҳсулотлар ҳамда миллий ҳунармандчилик кўргазмаси ташкил этилади.

Тўрақўрғон туман Маданият саройида Наманган вилояти ва Свердловск вилояти саънаткорларининг қўшма Дўстлик концерт дастури ташкил этилади.

Манба: Наманган вилояти ҳокимлиги