Бундан 22 йил аввал ташкил этилган мазкур санъат анжумани ўзининг эзгу ғоялари билан дунё халқлари ўртасида ҳамкорлик ва ҳамжиҳатликни мустаҳкамлаш, мусиқа санъати анъаналарини асраш ва ривожлантириш, маданиятлараро мулоқотни кучайтиришга хизмат қилиб келмоқда.

 

– Дунёда “Шарқ тароналари” сингари энг кўп иштирокчи қатнашадиган халқаро санъат фестивали бўлмаса керак, – дейди “Шарқ тароналари” халқаро мусиқа фестивали дирекцияси ижрочи директори Фарҳод Жўраев. – Шу пайтгача ўн бир марта ўтказилган фестивалда дунёнинг 114 давлатидан вакиллар қатнашган. Бу йил ҳам ҳозирча 78 давлатдан хонанда ва созандалар, бадиий жамоа ва ансамбллар, санъат ва мусиқашунослар иштирок этиш истагини билдирган. Улар орасида аввалги фестивалларда қатнашганлар ҳам, илк бор иштирок этадиганлари ҳам бор. Шу тарзда бу йил “Шарқ тароналари”да қатнашган давлатлар сони 120 дан ошиши кутилмоқда. Албатта, шундай катта нуфузга эга, ЮНЕСКО шафелигида ўтадиган ва ўн иккинчи бор дунё санъат аҳлини нигоҳида бўладиган бу йилги фестивални ҳам юксак савияда ўтказишга қизғин ҳозирлик кўрилмоқда. Бунда фестивалнинг барча иштирокчилари, халқаро ташкилотлар вакиллари, олий мартабали меҳмонлар қатнашадиган тантанали очилиш маросимини ҳам юқори даражада, халқимизнинг бой миллий мусиқа ва санъатини намоён этган ҳолда ташкил этишга алоҳида эътибор қаратилмоқда.

 

Ўзбекистон халқ артисти Баҳодир Йўлдошев режиссёрлигида тайёрланаётган дастур учун бу йил юртимиздаги мусиқа ва санъат йўналишидаги олий таълим муассасаларида таҳсил олаётган қарийб 100 нафар энг истеъдодли хонанда ва созандалар танлаб олинди. Шунингдек, миллий симфоник оркестр жамоаси ҳам жалб этилди.

 

Айни пайтда Регистон майдонида ўрнатилган фестивалнинг бош саҳнасида эрталаб ва кечқурун тайёргарлик жараёнлари давом этмоқда.