2018 йилда “Обод қишлоқ” дастури доирасида республиканинг 159 та туманидаги 417 та қишлоқнинг меъморий қиёфасини тубдан янгилаш ва ҳудудларни комплекс ривожлантириш мақсадида улардаги йўл-транспорт инфратузилмаси, муҳандислик-коммуникация тармоқлари ва ижтимоий соҳа объектларида қурилиш ва ободонлаштириш ишлари амалга оширилди.

 

Ўзбекистон Республикаси Президентининг 2018 йил 29 мартдаги “Обод қишлоқ” дастури тўғрисида”ги ПФ-5386-сон Фармонида белгиланган вазифалар ижросини самарали ташкил этиш, 2019 йилда “Обод қишлоқ” дастури (кейинги ўринларда Дастур деб аталади) доирасида ҳар бир туманда 3 тадан қишлоқ (маҳалла)да аҳолининг яшаш шароитларини тубдан яхшилаш, турмуш тарзи ва даражасида сезиларли ижобий ўзгаришларни таъминлаш, мазкур қишлоқ (маҳалла)ларнинг қиёфасини замонавийлаштириш ва унда истиқомат қилувчилар учун иш ўринларини яратиш мақсадида:

 

1. 2019 йилда Дастур доирасида қуйидагилар:

 

мамлакатимизнинг 159 та туманида 1,6 миллион нафардан ортиқ аҳоли истиқомат қиладиган 478 та қишлоқда амалга ошириладиган қурилиш ва ободонлаштириш ишларининг асосий кўрсаткичлари 1-иловага мувофиқ;

 

амалга ошириладиган чора-тадбирлар учун сарфланиши режалаштирилган 4,8 триллион сўм миқдоридаги харажатларнинг молиялаштириш манбалари 2-иловага мувофиқ;

 

умумий узунлиги 5 476 километрдан иборат минтақавий йўллар (ички кўчалар)ни таъмирлаш ва реконструкция қилиш чора-тадбирлари 3-иловага мувофиқ;

 

1,3 триллион сўм миқдоридаги маблағлар ҳисобидан қишлоқларни ободонлаштириш чора-тадбирлари 4-иловага мувофиқ;

 

36 мингдан ортиқ ҳамда умумий узунлиги 2 458 километр бўлган тунги кўча ёритиш ҳамда 21 та алоқа тизимини яхшилаш чора-тадбирлари 5-иловага мувофиқ;

 

аҳолига транспорт хизмати кўрсатиш тизимини такомиллаштириш, хусусан 556 та автобекат қуриш ҳамда умумий қиймати 46,3 миллиард сўмлик 189 та замонавий автобуслар харид қилиш бўйича чора-тадбирлар 6-иловага мувофиқ;

 

ичимлик суви таъминоти тизимини яхшилаш мақсадида 2 219 километр янги тармоқ ҳамда 221 та сув иншоотини қуриш, 729 километр тармоқлар ҳамда 163 та сув иншоотларини реконструкция қилиш чора-тадбирлари 7-иловага мувофиқ;

 

361 миллиард сўм миқдоридаги маблағлар ҳисобидан электр ва газ таъминоти тизимини яхшилаш чора-тадбирлари 8-иловага мувофиқ;

 

214,2 мингта якка тартибдаги уй-жойларни таъмирлаш бўйича чора-тадбирлар 9-иловага мувофиқ;

 

1 182 та кўп хонадонли уй-жойларни таъмирлаш чора-тадбирлари 10-иловага ҳамда 378 та кўп хонадонли уй-жойлар ҳудудларини ободонлаштириш чора-тадбирлари 11-иловага мувофиқ;

 

280 та мактабгача таълим, 510 та мактаб, 237 та соғлиқни сақлаш ҳамда 439 та бошқа ижтимоий соҳа объектларини қуриш ва таъмирлаш чора-тадбирлари 12-12.4-иловаларга мувофиқ;

 

жами 2 532 та бозор инфратузилмаси объектларини қуриш ва таъмирлаш юзасидан чора-тадбирлар 13-иловага мувофиқ;

 

ирригация-мелиорация соҳасида, жумладан, 296 километр ирригация ва 1 538 километр мелиорация объектларини қуриш ва таъмирлаш, 584 километр ирригация объектларини тозалаш бўйича амалга ошириладиган чора-тадбирлар 14-иловага мувофиқ;

 

талаб этиладиган асосий турдаги қурилиш ва пардозлаш материаллари тўғрисидаги кўрсаткичлар 15-иловага мувофиқ;

 

Дастур параметрлари ижросини ўз муддатида ва сифатли амалга ошириш бўйича қўшимча чора-тадбирлар режаси 16-иловага мувофиқ тасдиқлансин.

 

2. Ўзбекистон Республикаси Президентининг 2018 йил 29 мартдаги “Обод қишлоқ” дастурини 2018 йилда амалга ошириш бўйича қўшимча чора-тадбирлар тўғрисида”ги ПҚ-3630-сон қарори билан ташкил этилган

“Обод қишлоқ” дастурини амалга оширишни мувофиқлаштириш бўйича Республика комиссияси (кейинги ўринларда Республика комиссияси деб аталади) Қорақалпоғистон Республикаси Вазирлар Кенгаши, вилоятлар ҳокимликлари, тегишли вазирликлар ва идоралар билан биргаликда:

 

бир ой муддатда мазкур қарор параметрларидан келиб чиққан ҳолда, қишлоқларда 2019 йилда амалга ошириладиган қурилиш, таъмирлаш ва ободонлаштириш ишларининг маҳаллий ҳокимликлар ва тегишли вазирлик (идора)лар томонидан ишлаб чиқилган ҳамда Ўзбекистон Республикаси Инвестициялар ва ташқи савдо вазирлиги, Иқтисодиёт ва саноат вазирлиги ҳамда Молия вазирлиги билан келишилган туман ва қишлоқлар кесимидаги манзилли рўйхатларини тасдиқласин;

 

Дастурга киритилган қишлоқ аҳоли пунктларидаги мавжуд уй-жойлар, бино ва иншоотлар, инфратузилма объектлари, ичимлик сув тизимлари, йўл-транспорт ва муҳандислик-коммуникацияларининг техник ҳолатини ўрганиб чиқиб, шу асосда 2019 йилда қурилиш, реконструкция қилиш ва таъмирлаш ишларининг “тармоқ жадваллари”ни ишлаб чиқиб, тасдиқлаш ҳамда ижросини таъминлаш чораларини кўрсин.

 

Республика комиссияси (А.Раматов)га Қорақалпоғистон Республикаси Вазирлар Кенгаши ва вилоятлар ҳокимликлари ташаббуслари асосида тегишли давлат ва хўжалик бошқаруви органлари билан келишган ҳолда Дастурга қўшимча қишлоқларни киритиш ҳамда амалга ошириладиган қурилиш-таъмирлаш ва ободонлаштириш ишларининг лойиҳа-смета ҳужжатларини ишлаб чиқиш, экспертизадан ўтказиш натижалари бўйича иш ҳажмлари ва қийматларига аниқлик ва тузатиш киритиш ҳуқуқи берилсин.

 

3. Дастур доирасида бажариладиган қурилиш, таъмирлаш ва ободонлаштириш ишлари учун ажратилган маблағлардан мақсадли ҳамда самарали фойдаланиш, шунингдек, объектларнинг иш ҳажми ва лойиҳа-смета ҳужжатлари қийматининг асоссиз равишда ошириб юборилишига йўл қўймаслик учун Қорақалпоғистон Республикаси Вазирлар Кенгаши Раиси ва вилоятлар ҳокимлари шахсан масъулдир.

 

Дастур доирасида бажариладиган қурилиш, таъмирлаш ва ободонлаштириш ишлари бўйича иш ҳажми ва смета қиймати оширилган тақдирда қўшимча талаб этиладиган маблағлар Қорақалпоғистон Республикаси ва вилоят маҳаллий бюджетларининг қўшимча манбалари ҳисобидан амалга оширилиши белгилаб қўйилсин.

 

4. Ўзбекистон Республикаси Инвестициялар ва ташқи савдо вазирлиги, Молия вазирлиги, Иқтисодиёт ва саноат вазирлиги Қорақалпоғистон Республикаси Вазирлар Кенгаши, вилоятлар ҳокимликлари, тегишли вазирликлар, идоралар билан биргаликда республика бюджети ва мақсадли жамғармалар ҳисобидан молиялаштириладиган ижтимоий инфратузилма объектларини қуриш, реконструкция қилиш ҳамда таъмирлаш ишларини Ўзбекистон Республикасининг 2019 йилга мўлжалланган Инвестиция дастури доирасида амалга оширсин.

 

5. Қорақалпоғистон Республикаси Вазирлар Кенгаши ва вилоятлар ҳокимликлари ҳузуридаги “Ягона буюртмачи хизмати” инжиниринг компаниялари, шунингдек, вазирлик, идора ва хўжалик бирлашмалари тизимидаги буюртмачи хизматлар Дастурга киритилган объектлар бўйича буюртмачи этиб белгилансин.

 

6. Республика комиссияси (А.Раматов):

 

Дастурда иштирок этаётган Қорақалпоғистон Республикаси Вазирлар Кенгаши ва вилоятлар ҳокимликлари, вазирликлар ва идораларнинг фаолиятини мувофиқлаштириб, ўзаро ҳамкорлигини таъминласин ҳамда юзага келган муаммоли масалаларни тезкор равишда ҳал этиш чораларини кўрсин;

 

қурилиш ва ободонлаштириш ишлари бўйича белгиланган кўрсаткичлар ижросини ўз вақтида ва тўлиқ таъминлаш юзасидан тизимли мониторинг юритиб, мунтазам равишда муҳокама қилиб борсин;

 

Дастур параметрлари бажарилишини кечиктирган ёки таъминламаган маҳаллий давлат ҳокимияти органлари, давлат ва хўжалик бошқаруви органлари раҳбарларига нисбатан интизомий чоралар кўриш юзасидан Ўзбекистон Республикаси Вазирлар Маҳкамасига таклиф киритсин.

 

7. Ўзбекистон Республикаси Бош вазирининг ўринбосари – Ўзбекистон Республикаси молия вазири Ж.Қўчқоров ҳамда Бош вазирнинг инвестициялар ва ташқи иқтисодий алоқалар масалалари бўйича ўринбосари Э.Ғаниев давлат ҳамда хўжалик бошқаруви органлари томонидан тақдим этилган лойиҳалар асосида Дастурни амалга оширишга халқаро молия институтлари ва хорижий ҳукуматлар молия ташкилотларининг узоқ муддатли имтиёзли кредитларини ва бошқа молиявий манбаларни жалб этиш чораларини кўрсин.

 

Ўзбекистон Республикаси Уй-жой коммунал хизмат кўрсатиш вазирлиги, Транспорт вазирлиги ва Энергетика вазирлиги Дастурга киритилган қишлоқ аҳоли пунктларида ижтимоий соҳа объектлари, йўл-транспорт инфратузилмаси ва муҳандислик-коммуникациялари тармоқлари қурилиши учун лойиҳаларнинг молиявий-иқтисодий ҳисоботини (лойиҳаолди ҳужжатини) бир ой муддатда тайёрлаб, Инвестициялар ва ташқи савдо вазирлигига тақдим этсин.

 

8. Ўзбекистон Республикаси Иқтисодиёт ва саноат вазирлиги, “Ўзметкомбинат” АЖ, “Ўзсаноатқурилишматериаллари” уюшмаси, “Ўзнефтмаҳсулот” АЖ буюртмачилар ва лойиҳа ташкилотларининг асосланган ҳисоб-китоблари бўйича Дастур доирасида 2019 йилда қишлоқ аҳоли пунктларида ижтимоий соҳа объектлари, муҳандислик коммуникация тармоқларини қуриш ва таъмирлаш учун биржа котировкаларининг ўртача нархларига мувофиқ ҳақини олдиндан тўлаш шарти билан металл прокати, цемент ва ёқилғи-мойлаш маҳсулотлари ажратилишини таъминласин.

 

9. Қуйидагилар:

 

ушбу қарорнинг талаблари ўз вақтида ва тўла-тўкис амалга оширилишини таъминлаш устидан назорат олиб борилиши юзасидан – Ўзбекистон Республикаси Бош вазирининг биринчи ўринбосари – Ўзбекистон Республикаси транспорт вазири А.Раматов зиммасига;

 

ушбу қарор билан тасдиқланган йиғма кўрсаткичлар ва асосий параметрларга мувофиқ уй-жойларни таъмирлаш, муҳандислик-транспорт коммуникациялари ҳамда инфратузилма объектларини ўз вақтида ва сифатли қурилиши ва таъмирланиши юзасидан – Ўзбекистон Республикаси қурилиш вазири А.Тўхтаев зиммасига;

 

қурилиш-монтаж ишлари таннархини пасайтириш ва уларда маҳаллий замонавий қурилиш материаллари ва ускуналарини кенг қўллашга қаратилган чора-тадбирларни изчил амалга ошириш юзасидан – Ўзбекистон Республикаси иқтисодиёт ва саноат вазири Б.Хўжаев зиммасига шахсий жавобгарлик юклансин.

 

10. Ўзбекистон Республикаси Иқтисодиёт ва саноат вазирлиги манфаатдор вазирликлар ва идоралар билан биргаликда икки ой муддатда қонунчиликка ушбу қарордан келиб чиқадиган ўзгартиш ва қўшимчалар юзасидан Вазирлар Маҳкамасига таклифлар киритсин.

 

11. Мазкур қарорнинг ижросини назорат қилиш Ўзбекистон Республикасининг Бош вазири А.Н.Арипов ва Ўзбекистон Республикаси Президенти Администрацияси раҳбари З.Ш.Низомиддинов зиммасига юклансин.

 

 

 

Тошкент шаҳри, 2019 йил 20 февраль