2018 йил 26 ноябрь куни Ўзбекистон Республикаси Марказий сайлов комиссияси раиси Мирза-Улуғбек Абдусаломовнинг Европада Хавфсизлик ва Ҳамкорлик Ташкилоти (ЕХҲТ) Демократик институтлар ва инсон ҳуқуқлари бўйича бюроси (ДИИҲБ)нинг директори Ингибьёрг Сольрун Гисладоттир бошчилигидаги делегацияси билан учрашуви бўлиб ўтди.

Ушбу учрашув 2018 йилнинг 22-23 ноябрь кунлари Самарқанд шаҳрида бўлиб ўтган “Бутунжаҳон инсон ҳуқуқлари декларацияси қабул қилинганининг 70 йиллиги якунлари: замонавий таҳдидлар ва реал воқелик” мавзусидаги Инсон ҳуқуқлари бўйича Осиё форуми доирасида ўтказилди.

Марказий сайлов комиссияси Раиси делегация аъзоларини ЕХҲТ ДИИҲБ билан ҳамкорлик ушбу халқаро ташкилот вакилларининг Ўзбекистондаги сайловларда кузатувчилар сифатида 1999 йилдан эътиборан фаол иштирок этиб келаётгани ҳақида батафсил маълумот берди.

Сайлов тўғрисидаги миллий қонунчиликни янада такомиллаштириш, сайловларни демократик тамойиллар ва халқаро стандартларга мувофиқ очиқ ва эркин ўтказиш мақсадида ЕХҲТ ДИИҲБнинг таклифлари ва тавсиялари ҳар томонлама ўрганилаётганлиги ҳамда инобатга олинаётганлиги таъкидланди. Сайлов кодекси лойиҳаси ишлаб чиқилиши, шунингдек уни ЕХҲТ ДИИҲБга ўрганиш учун юборилиши бунга мисол тариқасида келтириш мумкин. Бунинг якуни бўйича жорий йилнинг сентябрь ойида ЕХҲТ ДИИҲБ ва Венеция комиссияси делегацияси Сайлов кодекси лойиҳаси юзасидан дастлабки тайёрланган хулосаларини кўриб чиқиш учун Ўзбекистонга ташриф буюрдилар ҳамда кейинчалик унинг муҳокамаси Ҳуқуқ орқали демократия учун Европа Комиссияси (Венеция комиссияси)нинг 116-ялпи йиғилишида Ўзбекистон Республикаси делегациясининг иштирокида бўлиб ўтган.

Шунингдек, ЕХҲТ ДИИҲБ, Венеция комиссияси ва сайлов тизими соҳасидаги бошқа халқаро институтлар иштирокида Сайлов кодекси лойиҳасининг экспертлик муҳокамаси 16-17 ноябрь кунлари Бухоро шаҳрида бўлиб ўтган халқаро конференцияда ўтказилди.

Бевосита ҳамкорлик Марказий сайлов комиссияси вакилларининг Варшава (Польша)да ЕХҲТ ДИИҲБнинг инсонийлик мезонлари бўйича йиллик мажлисларидаги иштироки доирасида ҳам амалга оширилмоқда.

Ўз навбатида, ЕХҲТ ДИИҲБ директори мамлакатимизда сайлов тизимини янада такомиллаштириш масалалари, хусусан, Ўзбекистон Республикаси Президентининг 2017 йил декабрь ойида Олий Мажлисга йўллаган Мурожаатномасида Сайлов кодекси лойиҳасини ишлаб чиқиш бўйича қўйилган вазифаларга берилаётган эътиборни юқори баҳолади.

Тарафлар икки томонлама муносабатларни давом эттиришга тайёр эканлигини таъкидладилар ва келгуси ҳамкорликни янада мустаҳкамлаш бўйича фикр алмашдилар, шунингдек Марказий сайлов комиссияси ва ЕХҲТ ДИИҲБнинг ўзаро ҳамкорлик қилишининг асосий йўналишларини муҳокама қилдилар.

Учрашувда ЕХҲТнинг Ўзбекистондаги лойиҳалари координатори Джон МакГрегор, ЕХҲТ ДИИҲБ директорлар офисининг раҳбари, элчи, катта сиёсий маслаҳатчи Грета Гуннарсдоттир, шунингдек Марказий сайлов комиссияси масъул ходимлари ва ЕХҲТнинг Ўзбекистондаги лойиҳалари координатори офисининг вакиллари иштирок этди.

Манба: Марказий сайлов комиссияси